Zasnavalnik amierykanskaj kampanii SpaceX Iłan Mask prezientavaŭ pratatyp šmatrazovaha kaśmičnaha karabla, zdolnaha pieravozić hruzy i kasmanaŭtaŭ na Mars i Miesiac. Prezientacyja tranśliravałasia anłajn u aficyjnym Twitter-akaŭncie kampanii.
Kaśmičny aparat atrymaŭ nazvu Starship. Jaho daŭžynia — 50 mietraŭ, a masa biez uliku paliva i hruzu — kala 120 ton. Padčas prezientacyi Mask zajaviŭ, što Starship, zdolny pieravozić da 100 čałaviek, moža stać asnovaj dla kałanizacyi Marsa i Miesiaca.
Pavodle Maska, pieršy palot karabla adbudziecca ŭ najbližejšyja dva miesiacy. Rakieta padymiecca na vyšyniu amal u 20 kiłamietraŭ i praź niekatory čas vierniecca na Ziamlu.
«Heta hučyć jak varjactva, ale ja dumaju, što my pasprabujem vyjści na arbitu mienš jak za šeść miesiacaŭ», — skazaŭ Mask. Pasadka Starship ujaŭlaje saboj kantralavanaje padzieńnie — karabiel pieravaročvajecca niezadoŭha da pryziamleńnia, dadaŭ jon.
Płanujecca, što paśla ŭsich vyprabavańniaŭ karabiel zmoža pravodzić na arbicie da dvuch miesiacaŭ. U SpaceX taksama zajavili, što Starship — «samaja mahutnaja rakieta ŭ historyi».
Starship źjaŭlajecca druhoj stupieńniu stvaranaj SpaceX šmatrazovaj kaśmičnaj transpartnaj sistemy BFR. Druhaja stupień atrymaje šeść ruchavikoŭ Raptor, pieršaja — 31. Raptor pracuje na mietanie i kisłarodzie. U šmatrazovym varyjancie sistema BFR raźličana na vyviadzieńnie na kalaziamnuju arbitu da 150 ton karysnaj nahruzki i viartańnie na Ziamlu da 50 ton, a taksama kamfortnuju transparciroŭku da 100 čałaviek (pa dvoje-troje ŭ kajucie) da Miesiaca i Marsa. Sistema palacić u 2022 hodzie.
