«Biełtelekam» zapuskaje ŭłasny telekanał «Jasnaje TV». Jon źjaŭlajecca novaj viersijaj telekanała «Minsk TV», jaki na praciahu siami hadoŭ vychodziŭ u efir, paviedamlaje pres-słužba kampanii.
Na kanale buduć pakazvać lepšyja filmy załatoha fondu mastackaha kino, rejtynhavyja stužki apošnich hadoŭ, ajčynnyja i zamiežnyja sieryjały, multyplikacyjnyja, dakumientalnyja karciny, spartyŭnyja spabornictvy. Taksama hledačam prapanujuć cikavyja aŭtarskija prajekty.
Tranślacyja budzie vieścisia 24 hadziny ŭ sutki. Kantent u farmacie Full HD aryjentavany na šyrokuju aŭdytoryju. U pryvatnaści, u pramym efiry płanujecca pakazać usie hulni čempijanatu Biełarusi pa futbole, chakiejnyja matčy, pajadynki pa kibiersporcie.
Movy viaščańnia — biełaruskaja i ruskaja.
