Dziŭnaja historyja adbyłasia ŭ vajskovaj čaści №97106 u Astraŭcy — tam siaržanta Juryja Baradzionka adpravili na haŭpvachtu na 10 sutak.
Aficyjna — za karystańnie niestatutnym telefonam, smartfonam.
Nieaficyjna — za kiravańnie małaviadomym telehram-kanałam «Biełaruskaja kuchnia». Telehram-kanał pazicyjanavaŭ siabie jak ahrehatar dasłanych historyj pra biełaruskaje vojska.
«Usio apublikavanaje ŭ kanale źjaŭlajecca asabistym mierkavańniem abo dadumkaj aŭtaraŭ. Pamiatajcie pra heta, bo, publikujučy vašyja historyi, administracyja kanała nie moža nijak pravieryć ich praŭdzivaść», — havorycca ŭ adnym z dopisaŭ. Publikavanaja ŭ kanale infarmacyja, jak praviła, była krytyčnaj u adnosinach da vajskovych realij.
Nieviadoma, jak kankretna, ale aŭtara kanała vyličyli ŭ Minabarony. Heta akazaŭsia akurat toj samy Baradzionak.
Jahony apovied ab dalejšych padziejach apublikavaŭ inšy administratar.
U aŭdyjazapisie poŭna łajanki, u ahulnych rysach źmiest taki: pamočnik ministra abarony pa ideałohii Leanid Kasinski źviazaŭsia z kamandziram čaści Aleham Baćkovym i nibyta zahadaŭ razabracca z sałdatam.
Baćkoŭ vyklikaŭ taho da siabie i davioŭ rašeńnie ab pakarańni, u žyvapisnych vyrazach paspačuvaŭšy kiraŭnictvu: «Na miescy ministra ja b stralaŭ takich, jak ty. Škada, što ciapier žyćcio sałdata nie 38 kapiejek — kolki kaštavaŭ patron», — takija słovy prypisvaje Baćkovu sam Baradzionak.
Varta adznačyć, što paśla taho, jak historyja stała viadomaj telehram-supolnaści, efiekt Strejzand pavialičyŭ aŭdytoryju kanała ŭ niekalki razoŭ — ciapier tam bolš za 3 tysiačy padpisantaŭ (u hety čas aficyjnamu kanału Minabarony nie chapaje niekalki čałaviek da 600 padpisantaŭ).
Što pra hetuju historyju kažuć u Minabarony?
Pres-sakratar Uładzimir Makaraŭ skazaŭ «Našaj Nivie», što taki sałdat sapraŭdy adbyvaje pakarańnie.
«Kamandzir pryciahnuŭ jaho da adkaznaści za vykarystańnie na terytoryi čaści mabilnych srodkaŭ niestatutnaha ŭzoru. Dziejničaŭ jon u adpaviednaści z dyscyplinarnym statutam», — skazaŭ nam Makaraŭ.
Pavodle jahonych słovaŭ, pra toje, što hety sałdat viadzie telehram-kanał, va ŭpraŭleńni ideałahičnaj raboty daviedalisia, pačytaŭšy kanał Eduarda Palčysa.
