Hod tamu, 23 žniŭnia 2018 hoda, pamior Aleś Lipaj — paet, žurnalist, zasnavalnik i kiraŭnik niedziaržaŭnaha ahienctva BiełaPAN. Jamu było 52 hady.
Aleś Lipaj zasnavaŭ ahienctva ŭ 1991 h. i doŭhi čas byŭ jaho kiraŭnikom. U 2018 hodzie BiełaPAN byŭ hienieralnym sponsaram śviata na Dzień Voli, a Lipaj vystupiŭ z pałymianaj pramovaj la Opiery.
Uletku 2018-ha Departamient finansavych rasśledavańniaŭ zavioŭ kryminalnuju spravu na Alesia. Jaho abvinavacili ŭ niaspłacie padatkaŭ na sumu 173 tysiačy rubloŭ, doma byŭ praviedzieny pieratrus. Hrošy, imavierna, byli nie asabistyja, a sabranyja dla pracy ahienctva BiełaPAN. Padatki byli kampiensavanyja dziaržavie, ale kryminalnuju spravu ŭsio adno nie spynili.
A ŭ žniŭni taho ž hoda supracoŭniki Śledčaha kamiteta pryjšli ź pieratrusam u redakcyju BiełaPAN pa h.zv. «spravie BiełTA», byli na karotki čas zatrymanyja Iryna Leŭšyna i Taćciana Karaviankova. Lipaj tady jak adrezaŭ: «My dziaŭčat ŭ kryŭdu nie damo».
Praz dva tydni jaho nie stała.
Da hadaviny śmierci na kraŭdfandynhavaj płatformie «Ulej» byŭ abvieščany zbor srodkaŭ na pomnik. Nieabchodnuju sumu — 10 tysiač rubloŭ — sabrali.
Pomnik budzie adkryty na mahile žurnalista ŭ Rudziensku ŭ prysutnaści rodnych i kalehaŭ naprykancy žniŭnia. Tut pachavanyja taksama jaho maci i siastra.
Piać faktaŭ pra zasnavalnika BiełaPAN Alesia Lipaja
