Kafiedralny sabor Salihorska, ilustracyjnaje fota
«U nas u Salihorskim rajonie jość 20 pravasłaŭnych cerkvaŭ, a ŭ samim horadzie — 8 kultavych pabudoŭ. Na adzin z saboraŭ, jaki budavaŭsia bolš za 15 hod, dobraachvotna-prymusova vykačvali hrošy ź viernikaŭ i nie viernikaŭ. Taksama niadaŭna ŭźviali carkvu la sanatoryja «Biarozka». Potym pačali budavać carkvu na vulicy Nabiarežnaj — ludzi byli suprać, składali pietycyju, ale ŭsio roŭna ich nie pasłuchali. Jość taksama carkva ŭ mikrarajonie «Čyžy». I akramia hetaha jašče čatyry prychody ŭ roznych častkach horada! — raskazvaje žycharka Salihorska Natalla Trafimčuk. —
I voś tut u novym mikrarajonie vyrašyli u lesaparkavaj zonie vyrubić častku drevaŭ i pabudavać carkvu. Vosiem mała, treba jašče dziaviatuju! Pry hetym parkaŭ, spartyŭnych placovak — pa palcach možna pieraličyć. Užo nie kažučy pra balnicy, palikliniki, dzie niama aparataŭ MRT».
Płan mikrarajona №21. Ružovy pramavuholnik unizie — miesca, dzie płanujuć pabudavać carkvu.
Hramadskija abmierkavańni pa płanie zabudovy mikrarajona buduć iści da 12 žniŭnia. Haradžanie ŭžo stvaryli pietycyju suprać budaŭnictva chrama Śviaciciela Mikałaja Cudatvorca. Jaje aŭtary padličyli, što ŭ Salihorsku adzin pravasłaŭny prychod prypadaje na 20 tysiač nasielnictva, «što źjaŭlajecca najvialikšym pakazčykam va ŭsioj Biełarusi». Za dzień pietycyju padpisała bolš za 370 čałaviek.
Adkaznym za hramadskaje abmierkavańnie płana mikrarajona pryznačany namieśnik kiraŭnika adździeła architektury i budaŭnictva Salihorskaha rajvykankama, hałoŭny architektar horada Valancin Stasiukievič.
«Naša Niva» źviarnułasia da jaho z prośbaj prakamientavać zabudovu, ale čynoŭnik kinuŭ słuchaŭku.
