Učora ŭ Kyrhyzstanie pravaliłasia sproba zatrymać eks-prezidenta krainy Ałmaźbieka Atambajeva ŭ jaho ŭłasnym asabniaku ŭ vioscy Koj-Taš pa padazreńni ŭ karupcyjnych złačynstvach. Jaho prychilniki akazali supraciŭ śpiecnazu i navat zachapili niekalkich bajcoŭ i ŭtrymlivajuć ich u domie. Jak vyhladaje hety asabniak i jakija skandały ź im źviazanyja — piša tut.by.
Fota: «Radyjo Svaboda».
Siało Koj-Taš znachodzicca za 15—20 kiłamietraŭ ad Biškieka. U 2015 hodzie Atambajeŭ uziaŭ tam u arendu 0,15 hiektara ziamli za miljon somaŭ, abo prykładna za 14 tysiač dołaraŭ, dla budaŭnictva doma. Raboty vialisia ŭdarna, i ŭ 2016 hodzie asabniak vyhladaŭ praktyčna hatovym:
Skrynšot z YouTube.com
Skrynšot z YouTube.com
Jak bačym, tut raźmieščany nie tolki asabniak, ale i haściavyja damki ci damki prysłuhi j achovy. Na ŭčastku taksama raźmieščany basiejn.
— Terytoryja doma, raźmieščanaha ŭ kancy Koj-Taša, aharodžanaja vysačeznym płotam. Pa pierymietry płot litaralna našpihavany kamierami videanazirańnia, a kala bramy kupiacca inšamarki. Achoŭniki, apranutyja ŭ vajskovuju formu, nie dazvolili prajści za varoty, — apisvaŭ svaje ŭražańni karespandent «Radyjo Svaboda».
Fota: «Radyjo Svaboda»
U 2017 hodzie Atambajeŭ pakinuŭ pasadu prezidenta i ciapier pastajanna žyvie ŭ hetym domie. Ciapier asabniak vyhladaje voś tak:
Fota: elgezit.kg
Jakija skandały byli z-za hetaha doma?
U 2015 hodzie adzin z kyrhyzskich deputataŭ abvinavaciŭ Atambajeva ŭ tym, što ziamlu dla budaŭnictva doma ŭ Koj-Tašy jon atrymaŭ praz žonku tahačasnaha mera Biškieka. Maŭlaŭ, heta stała svojeasablivaj mzdoj za znachodžańnie kiraŭnika horada na svajoj pasadzie.
Pradstaŭniki Atambajeva heta admaŭlali i kazali, što prezident nabyŭ ziamlu na svaje hrošy i dom buduje taksama na ŭłasnyja srodki. Jak paviedamlaŭ kloop.kg, prybytki prezidenta tady sapraŭdy dazvalali nabyć ziamlu za za 1 młn somaŭ (14,3 tysiačy dołaraŭ), bo za 2015 hod jon atrymaŭ za 1,3 młn somaŭ (18,6 tysiačy dołaraŭ) u jakaści zarobku i bolš 7,5 młn somaŭ (107 tysiač dołaraŭ) u jakaści pracentaŭ ad układaŭ. Chapiła b hetych hrošaj jašče i na maštabnuju budoŭlu — pytańnie adkrytaje.
Jašče adzin niuans u tym, što ŭ razhar budoŭli ŭ 2016 hodzie, jak miarkujecca, ziamla Atambajeva ŭ Koj-Tašy adnosiłasia da sielhasuhodździaŭ, na jakich budaŭnictva zabaroniena. Kab heta było mahčyma, metavaje pryznačeńnie ŭčastka treba było mianiać pastanovaj urada. Tady hetaha zroblena nie było. Ale ciapier u Atambajeva i zusim mohuć adabrać hety ŭčastak, i heta nie budzie niečym novym dla eks-kiraŭnikoŭ Kyrhyzstana.
Tak, pieršy prezident Kyrhyzstana Askar Akajeŭ pabudavaŭ sabie vielizarny pa biškiekskich mierkach budynak, jaki pavinien byŭ stać biblijatekaj. Ale paśla 24 sakavika 2005 hoda budynak pierajšoŭ va ŭłasnaść dziaržavy. A paśla padziej 2010 hoda było nacyjanalizavana 47 abjektaŭ, jakija naležali źbiehłamu prezidentu Kurmanbieku Bakijevu i jaho blizkim.
