Uładzimira Dzialendzika abvinavacili ŭ parušeńni PDR, jakoje paciahnuła pa nieaściarožnaści śmierć čałavieka (č. 2 art. 317 KK Biełarusi). Siońnia ŭ sudzie Centralnaha rajona Minska adbyłosia druhoje pasiedžańnie pa hetaj kryminalnaj spravie, a nie bolš čym praz hadzinu paśla pačatku słuchańniaŭ pa im było pryniata rašeńnie — abvinavačanaha amnistavali, piša Tut.by.
Na pieršym pasiadžeńni suda Uładzimir Dzialendzik zajaviŭ, što całkam pryznaje siabie vinavatym i raskajvajecca z taho momantu, jak adbyłosia DTZ.
— Sto pracentaŭ heta maja niaŭvažlivaść. Viadoma, ja parušyŭ praviły darožnaha ruchu, — kazaŭ pra pryčynu DTZ abvinavačany. — Raskajvajusia, vinavaty. Ja publična prynios prabačeńni praz presu, adrazu, kali tolki ŭsio zdaryłasia. Z paciarpiełymi ja padtrymlivaju adnosiny. Dačka zahinułaj, jakaja była za rulom, kaža, što daravała mnie, što heta tak skłalisia abstaviny.
Pa słovach Dzialendzika, praz paru dzion jon pieradaŭ paciarpiełaj hrošy, i jana kupiła novuju mašynu.
— Žančynie hetaj ja dapamahaju i ciapier, pieraličvaju hrošy. Akramia hetaha, ja apłaciŭ pryčynienuju škodu: chutkuju, pažarnuju, vyviernuty słup.
— Što było, to było, z kožnym takoje moža zdarycca… Abvinavačany nam hrašyma dapamahaje, časta telefanuje, — raspaviała na sudzie dačka zahinułaj u DTZ žančyny.
Avaryja adbyłasia 16 śniežnia 2018 hoda, u 9.40, na skryžavańni vulic Arłoŭskaj i Novavilenskaj. 66-hadovy kiroŭca Jaguar jechaŭ pa vulicy Novavilenskaj z boku zavułka Čarviakova i na skryžavańni z vulicaj Arłoŭskaj ździejśniŭ sutyknieńnie «Falksvahienam», jaki jechaŭ ad praśpiekta Pieramožcaŭ pa vulicy Arłoŭskaj. Paśla sutyknieńnia «Falksvahien» najechaŭ na bardziur, źnios śviatłafor i pierakuliŭsia na dach.
U vyniku DTZ kiroŭca «Falksvahiena» i 69-hadovaja pasažyrka atrymali traŭmy roznaj stupieni ciažkaści i byli dastaŭleny ŭ balnicu, dzie apošniaja nieŭzabavie pamierła.
Paźniej vyśvietliłasia, što za rulom «Jahuara» znachodziŭsia zasnavalnik «Darydy» Uładzimir Dzialendzik. Da jaho była prymieniena miera strymańnia ŭ vyhladzie padpiski ab niavyjeździe i naležnych pavodzinach.
