U Breście płanujecca ŭstalavać pamiatny znak achviaram hieta i biust maršała Kanstancina Rakasoŭskaha. Pra heta zajaviŭ staršynia harvykankama Alaksandr Rahačuk na sustrečy z žycharami abłasnoha centra, pieradaje BiełTA.
U pačatku hetaha hoda na budaŭničaj placoŭcy ŭ centry Bresta byli znojdzienyja pareštki 1214 viaźniaŭ jaŭrejskaha hieta. Pryniata rašeńnie ŭviekaviečyć ich pamiać i ŭstalavać pamiatny znak na skryžavańni praśpiekta Mašerava i vulicy Kujbyšava.
«Chočam zrabić znak, jaki stanie ŭ tym liku miescam ŭvahi moładzi, turystaŭ. Vyvučajem suśvietny vopyt, padychody. Tyja eskizy, jakija ciapier jość, u pryncypie, dazvalajuć kazać, što budzie cikavy prajekt. Jon prymusić žychara sučasnaha horada ŭspomnić padziei 1941—1942 hadoŭ: na kartu ciapierašniaha Bresta nakładziem kartu hieta z tymi nazvami vulic», - raspavioŭ Alaksandr Rahačuk.
Taksama mer adznačyŭ, što hramadskaść prapanavała ŭviekaviečyć pamiać maršała Kanstancina Rakasoŭskaha, jaki kiravaŭ apieracyjaj pa vyzvaleńni Bresta.
Kanstancin Rakasoŭski ŭ maładości.
«Na biuście chočam napisać pa-biełarusku: «Maršału Rakasoŭskamu ad udziačnych bieraściejcaŭ».
Adpaviednyja ŭzhadnieńnia ź Ministerstvam kultury projdzieny, zaraz idzie praces tvorčaha ŭvasableńnia. Ale samaje składanaje — vybar miesca», — padkreśliŭ staršynia harvykankama.
Čytajcie: Na 1000-hodździe Bresta ŭ centry horada pastaviać trochmietrovy biust Puškina
