Jašče ŭ mai žychar horada Hienadź Jasievič źviarnuŭsia va ŭpraŭleńnie pa adukacyi Baranavickaha harvykankama z pytańniem, ci budzie stvorany u horadzie biełaruskamoŭny kłas. Bo jaho syn Zianon vosieńniu pojdzie ŭ 1 kłas, i Hienadź chacieŭ by, kab dzicio atrymlivała adukacyju na rodnaj movie.
— U nas u siamji niama strohaj tradycyi razmaŭlać na adnoj movie. Doma my ŭsie karystajemsia dźviuma: ruskaj i biełaruskaj. I, na moj pohlad, vałodańnie nie tolki ruskaj, ale i rodnaj vielmi karysna, — raspavioŭ Hienadź.
Na toj čas siamja Jasievič była adzinaj, jakaja žadała addać svajo dzicia ŭ taki kłas. Hienadź byŭ upeŭnieny, što ŭ 170-tysiačnym horadzie znojducca baćki, jakija taksama zachočuć, kab ich syn abo dačka vyvučali školnyja pradmiety na biełaruskaj movie.
I ŭ chutkim časie takija achvotnyja znajšlisia. Ułady pajšli im nasustrač i adkryli nabor u pieršy kłas ź biełaruskaju movaju navučańnia.
— My sami chacieli, kab našyja dzieci navučalisia ŭ 9-j škole. Jana znachodzicca ŭ centry horada, tudy zručna dabiracca, — adznačaje Hienadź.
Pa jaho słovach, u biełaruskamoŭny kłas užo padali šeść zajaŭ.
Chto jašče žadaje, kab jaho pieršakłaśnik navučaŭsia na rodnaj movie, moža padać dakumienty ŭ SŠ №9 dla zaličeńnia. Nieabchodny: miedycynskaja daviedka ab stanie zdaroŭja dziciaci, kopija paśviedčańnia ab naradžeńni dziciaci, zajava (zapaŭniajecca na śpiecyjalnym błanku ŭ škole).
Darečy, u Baranavičach isnuje dva biełaruskamoŭnyja kłasy — abodva ŭ himnazii №4.
