Karłsan — viadučy kansiervatyŭnaha telekanała Fox News, a taksama adzin z ulubionych telepiersanažaŭ Trampa. Pa słovach krynicaŭ The New York Times, Karłsan skazaŭ Trampu, što adkazać na iranskija pravakacyi zbrojaj — heta «varjactva». Na dumku televiadučaha, hienierały-«jastraby» i daradcy pa nacyjanalnaj biaśpiecy, jakija namaŭlali Trampa raspačać ataku na Iran, nie ličacca ź intaresami prezidenta.
Kali Tramp raspačnie vajnu ź Iranam, to moža skazać «hud baj» svaim šancam być pieraabranym na druhi termin, — zajaviŭ jamu Karłsan.
I choć niama peŭnaści ŭ tym, što mienavita Karłsan mieŭ rašučaje značeńnie ŭ pieraduchileńni vajny, piša vydańnie, jaho hołas vidavočna ŭzmacniŭ sumnievy samoha Trampa.
The New York Times, jakaja tradycyjna žorstka krytykuje Trampa, adznačaje paradaksalnaść natury amierykanskaha prezidenta.
U toj čas, jak Tramp usialak padmacoŭvaje svoj imidž kanfliktnaha čałavieka, jon pieryjadyčna admaŭlajecca ad užyvańnia realnaj siły.
Tramp pierakanany, što Amieryka zmarnavała ŭžo dosyć žyćciaŭ i dosyć hrošaj u biessensoŭnych vojnach na Blizkim Uschodzie i nie choča paŭtarać pamyłki svaich papiarednikaŭ.
Surazmoŭcy haziety kažuć, što jašče adnym faktaram, jaki moh paŭpłyvać na rašeńnie Trampa, było toje, što jon i sapraŭdy nie byŭ upeŭnieny, ci Iran metanakiravana źbiŭ amierykanski bieśpiłotnik. Što, kali heta była pamyłka ci niepradumany krok? Dziela hetaha nie varta pačynać sapraŭdnuju vajnu.
Sam Takier Karłsan adreahavaŭ na rašeńnie Trampa tak:
«Kolki ludziej budzie zabita? Samaje prostaje z usich pytańniaŭ, ale jaho vielmi redka zadajuć lidary, jakija źbirajucca raspačać vajnu».
«Pačać vajnu pa drennaj paradzie — heta jak paniuchać kakainu. Pieršaja zaciažka padymaje tvoj rejtynh, ale padzieńnie nieminučaje».
Jak paviedamlałasia, 20 červienia Tramp u apošni momant adklikaŭ samaloty i karabli, jakija byli hatovyja atakavać Iran rakietami. Jak sam Tramp patłumačyŭ paźniej, jon nie chacieŭ adkazvać na źniščeńnie bieśpiłotnika atakaj, jakaja mahła zabrać žyćci jak minimum 150 irancaŭ.
