«Radio Svoboda»
Były kiraŭnik Ukrainskaj pravasłaŭnaj carkvy Kijeŭskaha patryjarchata (UPC KP) Fiłaret, jaki atrymaŭ paśla stvareńnia adzinaj aŭtakiefalnaj carkvy Ukrainy (PCU) tytuł hanarovaha patryjarcha, zajaviŭ, što nie pryznaje vydadzienaha Usialenskim (Kanstancinopalskim) patryjarchatam tomasa ab aŭtakiefalii.
«Hety tomas my nie prymajem, bo my nie viedali źmiestu tomasa, jaki nam dali. Kali b my viedali źmiest, to 15 śniežnia nie hałasavali b za aŭtakiefaliju», — skazaŭ Fiłaret, vystupajučy na forumie ŭkrainskaj intelihiencyi «Za Ukrainskuju pravasłaŭnuju carkvu! Za Kijeŭski patryjarchat».
Niepryznańnie tomas patryjarch patłumačyŭ niežadańniem «pierachodzić z adnoj zaležnaści ŭ inšuju».
«Maskoŭski patryjarchat słužyć intaresam Maskvy, PCU słužyć hrekam. A chto budzie słužyć Ukrainie?» — zajaviŭ Fiłaret.
Adnym z dokazaŭ zaležnaści PCU ad Usialenskaha patryjarchata Fiłaret nazvaŭ pryznačeńnie vychadca z Hrecyi, byłoha jepiskapa Olvijskaha Jepifanija (Dzimitryu) dapamožnym jepiskapam jaje pradstajaciela, mitrapalita Jepifanija (Dumienki).
«Što, niama ŭkrainca, što ty pastaviŭ hreka? Dla čaho ty hreka pastaviŭ? Dla taho kab hety hrek naziraŭ, što adbyvajecca va Ukrainie i pieradavaŭ infarmacyju Usialenskamu patryjarchu, i praź jaho ž Jepifanija pastupali ŭkazańni, što treba rabić. I heta nazyvajecca aŭtakiefalnaja carkva?» — zajaviŭ Fiłaret.
