Na pačatku červienia ŭ Pierajasłavie-Chmialnickim (horad u Kijeŭskaj vobłaści) dva supracoŭniki palicyi vypili i vyrašyli pastralać: zładzili samarobny cir z butelek u dvary žyłoha doma. Skončyłasia ŭsio trahiedyjaj.
Adna z kul trapiła ŭ hałavu susiedskamu 5-hadovamu chłopčyku. Jaho ekstrana špitalizavali, paśla pieravieźli ŭ reanimacyju ŭ Kijevie. Ale vyratavać dzicia daktary nie zmahli. 3 červienia chłopčyk pamior.
«Načalnik našaha rajadździeła pryjazdžaŭ u reanimacyju da nas i kazaŭ, što jany pryznajuć vinu, ale takija pjanyja, što nie viedajuć, chto ź ich heta zrabiŭ. Jany byli ŭ dym pjanyja, prosta zabaŭlalisia», — kazała pra palicejskich babula chłopčyka.
U vyniku kiraŭnik palicyi Kijeŭskaj vobłaści Dźmitry Canoŭ napisaŭ rapart ab zvalnieńni i paprasiŭsia vajavać na Danbas. Pra heta paviedamlaje MUS Ukrainy.
«Jak kiraŭnik palicyi Kijeŭskaj vobłaści, ja niasu adkaznaść za dziejańni maich padnačalenych. Ja napisaŭ rapart ab maim zvalnieńni i prašu kiraŭnika Nacpalicyi adpravić mianie ŭ samy haračy punkt našaj dziaržavy, u Danbas», — zajaviŭ Canoŭ žurnalistam.
Kiraŭnik Nacpalicyi padpisaŭ papiery ab adstaŭcy Canova. Pra toje, ci pajedzie Canoŭ u «haračy punkt», pakul nie paviedamlajecca.
