Ułaśnik «Biełhaziety» Kirył Žyvałovič dasłaŭ u Redakcyju «Našaj Nivy» svajo bačańnie situacyi sa zvalnieńniem papiaredniaha hałoŭnaha redaktara Ihara Vysockaha.
Čytajcie: Hałoŭny redaktar Ihar Vysocki syšoŭ z «BiełHaziety»
Kirył Žyvałovič (sprava) ciapier sam vykonvaje abaviazki hałoŭnaha redaktara «Biełhaziety». Fota Jeŭraradyjo
«Hałoŭny redaktar Ihar Vysocki pastaviŭ pad pahrozu vychad siońniašniaha numara. U subotu a 15-j hadzinie mnie stała viadoma pra toje, što jen nie płanuje pracavać nad numaram. Tak što jon nie syšoŭ, a budzie zvolnieny za sabataž i pa artykule Pracoŭnaha kodeksa z usimi vynikajučymi dla jaho nastupstvami.
Nad siońniašnim numaram pracavali dziejnyja supracoŭniki «BiełHaziety» i našy pastajannyja aŭtary, uzrovień jakich dazvalaje nie tolki zachoŭvać płanku našaha vydańnia, ale i brać novyja vyšyni. Słovami raskidvacca nie źbirajusia, bo chaj heta aceńvajuć čytačy našaha tydniovika. Čas pakaža, chto i što ŭmieje.
Z nahody naviny na «Jeŭraradyjo». Z čaho raptam niejki pravaabaronca abrastaje ŭsialakimi rehalijami i tytułami? Chto vyrašyŭ, što jon eks-dyrektar «BiełHaziety»? U adpaviednaści z rašeńniem ekanamičnaha suda horada Minska, jakoje było ahučana ŭčora, hety čałaviek byŭ pryznačany na pasadu dyrektara niezakonna. I jamu treba budzie adkazvać za heta ŭ adpaviednaści z Kryminalnym kodeksam Biełarusi. Mahu tolki z usioj adkaznaściu zajavić, što jon źjaŭlajecca afierystam, ašukancam i prajdziśvietam. I ja heta dakažu ŭ sudovym paradku.
Dakładna takoje ž u mianie ździŭleńnie vyklikajuć vykazvańni ab tym, što ŭ siońniašnim numary skroź imiony nieviadomych žurnalistaŭ. Heta pra kaho? Pra Alesia Kirkieviča? Pra Marynu Hulajevu? Pra Dźmitryja Dryhajła? Pra Juryja Dubinu? Pra Dzianisa Łaŭnikieviča? Tyja, chto moža nazvać hetych žurnalistaŭ nieviadomymi, chutčej za ŭsio, byli jašče niemaŭlom abo zusim u začatkavym stanoviščy, kali Hulajeva i Dubin pracavali ŭ «BiełHaziecie». I chaj takija zajaŭniki spačatku dasiahnuć 10% taho, što ŭmiejuć Dryhajła i Kirkievič, a potym dajuć acenki».
