Užo amal miesiac ministr zamiežnych spravaŭ Uładzimir Makiej nie fihuruje ŭ zvodkach navin. Apošniaje zhadvańnie aktyŭnaści čynoŭnika datujecca 23 studzienia, kali jon sustrakaŭsia z pasłom Čechii ŭ Biełarusi Tomašam Piarnickim.
Uładzimir Makiej i Viktar Łukašenka na pryjomie da 100-hodździa dypłamatyčnaj słužby. Fota Voli Aficeravaj
18 lutaha Uładzimira Makieja pakazali ŭ navinach padčas sustrečy Alaksandra Łukašenki ź jeŭrakamisaram pa biudžecie i čałaviečych resursach Hiunteram Ecinhieram. Ale cikavym źjaŭlajecca toje, što ŭžo ŭ samim ministerstvie kamisara prymaŭ namieśnik Makieja Aleh Kraŭčanka.
Pres-sakratar MZS Anatol Hłaz rašuča abviarhaje infarmacyju pra źniknieńnie ministra. Jon patłumačyŭ «Našaj Nivie», što tak było zapłanavana, kab Makiej nie sustrakaŭsia dvojčy ź jeŭrapiejskim hościem.
Praŭda, jašče miesiac tamu dziejničaŭ inšy padychod: ministr zamiežnych spraŭ Vienhryi Pieter Sijarta spačatku sustreŭsia z Alaksandram Łukašenkam i Uładzimiram Makiejem, a paśla jašče raz asobna tolki z Makiejem.
U raniejšyja pryjezdy inšych jeŭrakamisaraŭ Uładzimir Makiej taksama asobna prymaŭ haściej u MZS.
Źviartaje na siabie ŭvahu, što na Miunchienskuju kanfierencyju pa biaśpiecy taksama adpraviŭsia nie ministr profilnaha viedamstva, a kiraŭnik KDB Valeryj Vakulčyk.
Na 21 lutaha, praŭda, zapłanavany vyjazny pryjom hramadzian Uładzimiram Makiejem u Maładziečanskim rajvykankamie. Pryjom budzie adbyvacca ad 10 da 12 hadziny.
Na sajcie MZS za apošni miesiac dastatkova šmat paviedamleńniaŭ pra aktyŭnaść namieśnikaŭ Makieja — Dapkiunasa, Kraŭčanki, Jeŭdačenki, — ale pra samoha ministra ničoha niama.
U pačatku studzienia Alaksandr Łukašenka ŭručyŭ Uładzimiru Makieju orden Ajčyny III stupieni. A 18 studzienia adbyŭsia ŭračysty pryjom z nahody 100-hodździa biełaruskaj dypłamatyčnaj słužby. Faktyčna hetym dniom i datujecca źniknieńnie ministra ź infarmacyjnaha pola.
Vykazvajecca viersija, što źmianšeńnie aktyŭnaści kiraŭnika MZS moža być źviazana ź pieravodam jaho na inšuju pasadu.
Makieju pradkazvajuć rolu dziaržaŭnaha sakratara Rady biaśpieki.
Uładzimir Makiej. Fota Siarhieja Hudzilina.
Jašče ŭ śniežni 2018 hoda Łukašenka padpisaŭ prajekt rašeńnia Rady kalektyŭnaj biaśpieki ab pryznačeńni Stanisłava Zasia hiensakratarom ADKB. Kandydaturu Zasia ŭ jakaści kiraŭnika ADKB padtrymali Rasija, Kazachstan, Tadžykistan, Kyrhyzstan, ale «dabro» ŭsio jašče nie daje Armienija, ciahnučy čas. Tamu Zaś užo faktyčna znachodzicca ŭ roli nie dziaržsakratara Rady biaśpieki.
***
Uładzimir Makiej
Naradziŭsia ŭ 1958 u vioscy Niekraševičy Karelickaha rajona. Skončyŭ Minski dziaržaŭny instytut zamiežnych movaŭ (1980), słužyŭ u savieckaj raźviedcy (1980—1992), pałkoŭnik zapasu. Pieravučvaŭsia ŭ Dypłamatyčnaj akademii MZS Aŭstryi (1992—1993). Znachodziŭsia na dypłamatyčnaj słužbie (1993—2000), pracavaŭ pamočnikam prezidenta (2000—2008), kiraŭnikom Administracyi prezidenta (2008—2012). Ad žniŭnia 2012 — ministr zamiežnych spravaŭ. Maje synoŭ ad abodvuch šlubaŭ. Druhaja žonka — aktrysa i televiadučaja Viera Palakova.
