Kiraŭnik Biełarusi 12 lutaha pravioŭ kadravy dzień. Pra niekatorych z novych postaciaŭ možna pačytać u našym materyjale.
Małady namieśnik Šejmana
Andrej Śvirydaŭ z žonkaj. Fota ok.ru.
Novym namieśnikam kiraŭnika spravami prezidenta Viktara Šejmana staŭ 35-hadovy Andrej Śvirydaŭ. Da apošniaha času Śvirydaŭ uznačalvaŭ kamitet ekanomiki Hrodzienskaha abłvykankama.
Baćka Andreja Ryhor Śvirydaŭ źjaŭlajecca dyrektaram pradpryjemstva «Hrodnatekstyl». Tam ža pracavała i mama Halina. Baćka rodam z Mahilova, pryjechaŭ u Hrodna pa raźmierkavańni, mama — z Rasii.
Ryhor Śvirydaŭ u 2009 hodzie prachodziŭ fihurantam bujnaj kryminalnj spravy. Dyrektar prachodziŭ jak padazravany pa artykule «Złoŭžyvańnie ŭładaj albo słužbovymi paŭnamoctvami». Maŭlaŭ, jahonymi dziejańniami dziaržavie była naniesienaja škoda ŭ pamiery 500 tysiač dalaraŭ. Urešcie, Śvirydava nie asudzili. I jon praciahnuŭ zajmać pasadu dyrektara zavoda.
Andrej, paśla taho jak skončyŭ škołu ŭ Hrodnie, pastupiŭ u narhas na fakultet ekanomiki i kiravańnia handlem. Paśla skančeńnia vučoby viarnuŭsia ŭ rodny horad.
«Biznes na miescach treba bierahčy i pieścić», — kazaŭ jon u intervju haziecie «Biełorusy i rynok».
Andrej žanaty z 28-hadovaj haradzienkaj Volhaj.
Ad stalara da namieśnika ministra
Aleh Šviec. Fota minskstroy.by.
Aleh Šviec staŭ novym namieśnikam ministra architektury. Jamu 47 hadoŭ, a rodam ź Pinska. Pracoŭnuju karjeru pačynaŭ u jakaści stalara.
Maje dźvie vyšejšyja adukacyi: BNTU («Pramysłovaje i hramadzianskaje budaŭnictva») i BDEU («Ekanomika i kiravańnia na pradpryjemstvach»).
Ad 1994 pracuje inžynieram. Ad 2004 — va ŭpraŭleńni kapitalnaha budaŭnictva Minharvykankama. Ad 2010 — u «Minskbudzie». Źjaŭlaŭsia namieśnikam dyrektara pa pramysłovaści i resursach.
Letaś u spadara Šviaca pamior baćka.
Byŭ vykładčykam u PTV
Uładzimir Čušaŭ. Fota facebook.com.
Uładzimiru Čušavu, jaki staŭ pasłom Biełarusi ŭ Polščy, 55 hadoŭ. Naradziŭsia jon u Homieli. Tam ža i atrymaŭ adukacyju ŭ Instytucie inžynieraŭ čyhunačnaha transpartu. Hetuju samuju VNU, darečy, skončyŭ były premjer-ministr Siarhiej Sidorski.
Užo ŭ pieršyja hady niezaležnaści Čušaŭ skončyŭ jašče jurydyčny fakultet BDU. Pracavaŭ vykładčykam u adnym ź minskich PTV, potym tam ža byŭ zavučam. Pa razvale SSSR trapiŭ na pracu viadučym śpiecyjalistam u Ministerstva budaŭnictva i architektury.
Ad 1995 hoda — na słužbie ŭ MZS. Jahonaja dypłamatyčnaja karjera ŭvieś čas kruciłasia vakoł dźviuch krain — Sierbii i Polščy. Ad 1998 da 2002 byŭ daradcam u pasolstvie Biełarusi ŭ Juhasłavii. Heta značyć, jon na ŭłasnyja vočy bačyŭ krušeńnie dyktatury Słabadana Miłošaviča.
Ad 2006 da 2009 byŭ užo daradcam u pasolstvie Biełarusi ŭ Polščy. I heta nie samy lohki čas, paśla Płoščy-2006, kanfliktu z Sajuzam palakaŭ adnosiny pamiž Biełaruśsiu i Polščaj byli źviedzienyja amal da minimumu.
U 2011 hodzie Čušaŭ atrymaŭ pieršaje samastojnaje pryznačeńnie — pasłom Biełarusi ŭ Sierbii. Za hety pieryjad Łukašenka naviedvaŭ Białhrad. U pravasłaŭnaj Sierbii na pracoŭnym miescy pasła Čušava visieli abrazy. Cikava, ci budzie toje samaje ŭ Polščy?
Pradavaŭ BiełAZy ŭ Indyi
Vital Pryma. Fota twitter.com.
«Vušami i vačyma» prezidenta, to bok pamočnikam pa stalicy, staŭ były pasoł Biełarusi ŭ Indyi Vital Pryma.
Zrešty, nie treba padmanvacca: Vital Pryma — vychadziec nie z dypłamatyčnaj śfiery, a z mašynabudaŭnictva. Jamu 43 hady, a rodam jon sa Słonima.
Vučyŭsia ŭ BNTU pa śpiecyjalnaści «ekanomika i kiravańnie ŭ mašynabudavańni» (1997). Pa raźmierkavańni pajechaŭ pracavać u Barysaŭ na zavod «Aŭtahidraŭzmacnialnik». Pracavaŭ tam ekanamistam da 2001 hoda. Potym šeść hadoŭ addaŭ zavodu BiełAZ. U 2007 hodzie Prymu zabrali ŭ Minsk u Ministerstva pramysłovaści. Ad 2009 — byŭ namieśnikam ministra.
U 2012 hodzie spadar Pryma byŭ pryznačany pasłom Biełarusi ŭ Indyju (Šry-Łanka, Niepał i Banhładeš pa sumiaščalnictvie). Indyja — adzin z hałoŭnych kupcoŭ biełaruskich BiełAZaŭ, tamu taki vybar nievypadkovy.
«Vam daviadziecca padymać ceły płast», — tak Łukašenka nastaŭlaŭ Prymu pierad pryznačeńniem pasłom. Maŭlaŭ, heta pierśpiektyŭnaja kraina. I jana hatovaja šmat čaho kuplać u Biełarusi.
Padčas pracy ŭ Indyi zachapiŭsia johaj. Vystaŭlaŭ zdymki z zaniatkaŭ u tvitary. Žanaty, maje traich dziaciej.
Vyklikaŭ doždž praz malitvu
Anatol Markievič. Fota haziety «Novaje žyćcio».
Pamočnikam prezidenta pa Bresckaj vobłaści staŭ Anatol Markievič, jaki da hetaha byŭ staršynioj Navahrudskaha rajvykankama. Admietna, što staršynia Bresckaha abłvykankama Anatol Lis u svoj čas taksama ŭznačalvaŭ mienavita Navahrudski rajvykankam.
Markieviču 47 hadoŭ. Jon rodam ź vioski Hromki Ščučynskaha rajona. Vučyŭsia na nastaŭnika matematyki ŭ Bresckim piedahahičnym univiersitecie. Paśla pracavaŭ nastaŭnikam na radzimie ŭ Ščučynie. Užo ŭ 28 hadoŭ staŭ dyrektaram Karelickaj SŠ №1.
Ad 2002 hoda — na čynoŭnickaj pracy. Spačatku pracavaŭ namieśnikam staršyni Karelickaha rajvykankama. U 2011-m — staŭ staršynioj Navahrudskaha rajvynkama.
Za čas pracy ŭ Navahrudku zapomniŭsia tym, što inicyjavaŭ letaś malebien z prośbaj ab daždžy. Tady ŭ navahradski sabor pryjšła ŭsia rajonnaja viertykal. Jašče Markievič admoviŭsia nadać adnoj z vulic Navahrudku imia navukoŭca Barysa Kita. «Navahrudski rajvykankam paličyŭ heta niemetazhodnym», — było ŭ adkazie Markieviča.
Markievič taksama maje traich dziaciej.
