Rekłama narkotykaŭ na słupie kala DAI Maskoŭskaha rajona
Paśla artykuła Jeŭraradyjo pra rekłamu narkotykaŭ vakoł stancyi mietro «Michałova» ŭ Minsku kamunalnyja słužby źviarnuli ŭvahu na prablemu. Ciaham dnia supracoŭniki «Minsktransa» i «Minharśviatła» prybirali trafaretnyja nadpisy.
Ale zafarbavać usie nadpisy ŭ kamunalnych słužbaŭ nie atrymałasia. Ranicaj 28 studzienia ich možna znajści na kijoskach, na słupie nasuprać adździeła DAI UUS Maskoŭskaha rajona i na transfarmatary prosta la škoły №145 pa vulicy Alibiehava.
«My znajšli jašče štuk 30 [trafaretaŭ], — nie chavaje načalnik adździeła haradskoj haspadarki Administracyi Maskoŭskaha rajona Ihar Čarniecki. — Navat na dźviarach padjezdaŭ ad ruki napisanyja hetyja abjavy. My ŭvieś čas šukajem, zafarboŭvajem hetyja nadpisy, a jany znoŭ źjaŭlajucca. Usia vulica Rafijeva ŭ ich była! Jak tolki znachodzim nadpisy — adrazu paviedamlajem i zafarboŭvajem».
«Minharśviatło» prybiraje nadpisy ź lichtarnych słupoŭ, «Minsktrans» — z aporaŭ tralejbusnaj linii, «Harramaŭtadar» — z prypynkaŭ. Ale chto prybiare nadpisy z kijoskaŭ i transfarmataraŭ? Kolki jašče haradskich słužbaŭ treba padklučyć i skaardynavać, kab prybrać rekłamu narkotykaŭ ź minskich vulic?
U svaju čarhu, milicyja zajmajecca pošukam taho, chto pakidaje abjavy. U pres-słužbie HUUS Minharvykankama Jeŭraradyjo raskazali, što vyniki pravierki chutka buduć apublikavanyja.
