Kožny kvartał Ministerstva abarony vykładvaje aktualny śpis vakansij dla sałdat i siaržantaŭ dla praciahu słužby pa kantrakcie.
«Naša Niva» pahladzieła, jakaja ž rabota va ŭzbrojenych siłach prapanoŭvałasia stanam na kastryčnik 2018 hoda.
Bolšaść śpiecyjalnaściaŭ davoli prazaičnaja: heta kiroŭcy (nie tolki słužbovych mašyn, ale i bajavoj techniki), miechaniki, elektryki, telehrafisty, niedzie (u Bresckuju i Babrujskuju kamiendaturu) patrebny navat muzykanty.
Ilustracyjnaje fota
Jość i vyklučna vajennyja vakansii, kudy biez adpaviednaha dośviedu naŭrad ci trapiš: navodčyki, sapiory, strałki-zienitčyki, kamandziry adździaleńniaŭ.
Ale my źviarnuli taksama ŭvahu na toje, što pa abviestcy na sajcie Minabarony nabirajuć navat raźviedčykaŭ!
«Raźviedčyk-naziralnik», naprykład, patrabujecca ŭ štab 15-j zienitnaj rakietnaj bryhady (v/č 30151) la Fanipala.
U patrabavańniach — «najaŭnaść adpaviednaj padrychtoŭki».
Prosta «raźviedčyk» patrebny ŭ čaść № 89417 SSA ŭ Marjinaj Horcy.
Možna padumać, što pad hetaj farmuloŭkaj chavajecca ŭłasna toje, čamu vučać sałdataŭ, — raźviedcy i dyviersijam na miascovaści.
Raźviedčyki sił śpiecyjalnych apieracyj, fota: Ministerstva abarony
Takija ž raźviedčyki patrabujucca i ŭ bresckuju čaść SSA.
«Raźviedčyka-naziralnika» šukajuć u čaść, jakaja budzie zajmacca achovaj Astravieckaj AES.
Taksama «raźviedčyk» patrebny ŭ 19-ju asobnuju mabilnuju bryhadu (v/č №71327) u Zasłonavie.
Zarobki raźviedčykaŭ i inšych śpiecyjalistaŭ na sajcie nie paznačanyja.
Varta adznačyć, što praktyka naboru raźviedčykaŭ praź internet nie ajčynnaje nou-chau.
U pryvatnaści, izrailskaja śpiecsłužba «Masad» nabiraje achvotnych supracoŭničać padobnym čynam — raniej jany davali abviestki ŭ haziety, a ciapier prosta na ich sajcie jość adpaviedny raździeł ź instrukcyjami i pieraściarohami dla patencyjnych ahientaŭ.
Praŭda, u vypadku «Masada» havorka idzie chutčej pra dystancyjnych pastaŭščykoŭ infarmacyi, a nie štatnych raźviedčykaŭ.