Minski Budtrest №4 pabuduje 21-paviarchovy žyły kompleks dla biełaruskaha pasolstva ŭ Maskvie. Hienpadradčykam vystupaje BU-13, jakoje stvaryła akvapark «Lebiadziny» i novy budynak Viarchoŭnaha suda. U haziecie «Na strojkach Minska» pakazali, jak budzie vyhladać novy biełaruski kompleks u Maskvie.
Žyły kompleks pasolstva Biełarusi budujuć na padstavie ŭkaza Alaksandra Łukašenki ad 2014 hoda. Abjekt uźviaduć na Pahonnym prajeździe, 7. Heta rajon Baharodskaje va Uschodniaj administracyjnaj akruzie.
U šmatpaviarchoviku budzie 100 kvater: 20 adnapakajovych, 52 dvuchpakajovyja i 27 trochpakajovych. Zaprajektavana taksama kvatera ataše z załaj pasiadžeńniaŭ.
U prybudovie na ŭzroŭni pieršaha paviercha praduhledžany fizkulturna-azdaraŭlenčy kompleks z trenažornaj załaj, mini-basiejnam i saunaj. Na padziemnym paviersie - adnaŭzroŭnievaja stajanka na 60 mašyna-miescaŭ.
Zhodna ź mižuradavym pahadnieńniem, ziamielny ŭčastak pad žyły kompleks biełaruskaha pasolstva dadzieny Biełarusi ŭ arendu na 49 hadoŭ z arendnaj płataj u pamiery adnaho rasijskaha rubla ŭ hod.
Uzamien na heta Biełaruś dała Rasii ŭ arendu na 49 hadoŭ ziamielny ŭčastak na Kamunistyčnaj, 86, dla budaŭnictva i ekspłuatacyi budynka kulturna-dziełavoha centra. Ciapier tam znachodzicca Dom Maskvy. Arendnaja płata składaje adzin biełaruski rubiel u hod.
