Stalica Litvy pryciahvaje da siabie tysiačy biełarusaŭ štodnia. I heta nie dziva: ad Minska da Vilni ŭsiaho 180 kiłamietraŭ — heta bližej, čym da luboha abłasnoha centra.
Usiaho praz paru hadzin vy možacie trapić nie prosta ŭ adnu z stalic Jeŭrasajuza, ale i ŭ horad, prasiaknuty biełaruskaj minuŭščynaj. U hetym domie žyŭ Adam Mickievič, tut drukavaŭ svaje knihi Francišak Skaryna, a voś tam vydavałasia «Naša Niva». Mnohija lubiać Vilniu za jaje kaviarni i handlovyja centry. Karaciej, kožny zdolny znajści ŭ hetym horadzie niešta svajo.
Ciapier piarojdziem da razhladu ŭsich mahčymych varyjantaŭ, jak dajechać ź Minska da Vilni.
Ciahniki Minsk — Vilnia
Čas: Ad 2,5 da 4,5 hadziny
Cana: ad 34 da 89 rubloŭ
Mabyć, samy papularny varyjant dla tych, chto choča dajechać z kamfortam, ale nie addać za kvitok istotnuju častku zarobku. Ciahniki chodziać ad Centralnaha čyhunačnaha vakzała. Varyjant dajechać ciahnikom pryvablivaje tym, što nie treba doŭha stajać u čerhach. Biełaruskija pamiežniki praviarajuć dakumienty prosta ŭ ciahniku padčas ruchu. Na vilenskim vakzale vam usio ž daviadziecca pastajać u čarzie. U zaležnaści ad taho, ci chutka vy pryjdziecie na pašpartny kantrol, abo budziecie pleścisia ŭ kancy, zaležyć čas, praź jaki vy apynieciesia ŭ samim horadzie.
Ciahniki da Vilni chodziać sučasnyja, vyrablenyja na «Štadlery». U vahonach jość kandycyjanier, šmat miesca dla noh, razietki, kab zaradzić noŭtbuk ci mabilnik. Pracuje i vaj-faj. Kursujuć pa hetym maršrucie i litoŭskija ciahniki. Jany mała čym u zručnaści sastupajuć biełaruskim.
Bolšaść ciahnikoŭ adpraŭlajecca ranicaj. Možna taksama pajechać uviečary, kab pieranačavać u Vilni. Kaštavać heta budzie ŭ siarednim 35—40 rubloŭ. Raskład možna pahladzieć tut.
Kali asabliva nie ekanomicie hrošy ci nie majecie inšych varyjantaŭ, to dabracca možna na ciahnikach kštałtu Maskva — Kalinihrad ci Adler — Kalinihrad. Ale papiaredzim, što ich čas adpraŭleńnia nie nadta zručny. A čas znachodžańnia ŭ darozie pavialičvajecca da 4,5 hadziny. Zatoje jość mahčymaść paspać u płackarcie ci kupe. Cana płackarty — kala 30 rubloŭ, kupe — 75—80 rubloŭ.
Aŭtobusy Minsk-Vilnia
Čas: ad 4 da 5 hadzin
Cana: ad 12,5 da 35 rubloŭ.
Z aŭtobusami nikoli nie adhadaješ, kolki budzieš u darozie, bo možna niečakana zavisnuć na miažy. I ŭmoŭnyja čatyry hadziny pieratvoracca ŭ piać ci navat bolej. Ale heta bolš biudžetny transpart, čym ciahniki, jaki chodzić našmat čaściej.
Aŭtamabil Expressbus.by. Na takich adbyvajucca pajezdki ŭ Vilniu.
Pieravozčyk Expressbus.by maje kamfortnyja aŭtamabili z wi-fi i dvd, pry patrebie vydaje na čas usiaho šlachu pledy i paduški. Kiroŭca daje mahčymaść aformić Tax Free i zajazdžaje ŭ Duty Free.
Što tyčycca raskładu, to jon uličvaje vylety i pryloty ŭ aeraport Vilni. Heta asabliva zručna dla tych, chto lataje łaŭkostami Wizz Air i Ryanair. Kali raptam vaš samalot spaźniajecca, kiroŭca maršrutki čakaje da 20 chvilin. Miesca ŭ maršrutcy možna zabraniravać anłajn i adrazu apłacić.
Aŭtamabil Expressbus.by. Na takich adbyvajucca pajezdki ŭ Vilniu.
Inšy papularny pryvatny pieravozčyk — Ecolines. Ich aŭtobusy chodziać try razy na dzień. Ceny pačynajucca ad 24 rubloŭ.
Kali skarystacca roznymi źnižkami i kuponami, to hetuju sumu možna zaŭvažna źnizić, až da 11 rubloŭ. Źnižki na bilety da Vilni niaredka možna znajści na sajcie Slivki.by. Praŭda, kab nabyć tanny kvitok, daviadziecca spačatku kupić śpiecyjalny kupon za 1,50 rubla.
Taksama pieravozkami ŭ Vilniu zajmajucca kampanii Busfor, Intercars, Sheddi Tours i inšyja. Ich bilety možna kupić jak u ofisach, tak i ŭ internecie.
Aŭtobusy «Minsktransa» adpraŭlajucca ŭ Vilniu kala dziesiaci razoŭ na dzień. Pryčym adpravicca možna nie tolki ź Minska, ale i z Homiela, i z Barysava. Na bolšaści z hetych aŭtobusaŭ dabracca možna nie tolki da Vilni, ale i da aeraporta. Pahladzieć raskład i nabyć kvitki možna tut. Bazavaja cana — 22 rubli.
Samalot Minsk — Vilnia
Čas: 35 chvilin
Cana: ad 103 rubloŭ
Bilet «Biełavia» ŭ adzin bok nibyta kaštuje ad 103 rubloŭ.
Lacieć samalotam krychu bolej za paŭhadziny, ale dadajcie da ich jašče čas dabirańnia da aeraporta «Minsk» i ź vilenskaha aeraporta. Tak što atrymajecca nie nadta chutčej za ciahnik. A kaštavać budzie ŭ dva razy bolej.
Jak dabracca ŭ Vilniu aŭtamabilem
Čas: ad 3 hadzin i bolej
Cana: 30 jeŭra na strachoŭku + paliva
Ščaślivyja ŭładalniki ŭłasnych aŭto, naturalna, mohuć pajechać u Vilniu na svaim transparcie. Tolki chočacca papiaredzić, kab achvočyja ŭvažliva praviarali sajt Dziaržpahrankamiteta, a to zaŭždy jość imaviernaść pałovu dnia prastajać na miažy ŭ zatorach. Ci nie ŭ kožnaha jość znajomyja, jakija mohuć raspavieści padobnyja historyi.
Kali jedzieš za miažu mašynaj, to, aproč miedyčnaj strachoŭki, nie zabudźciesia aformić «zialonuju kartu». Heta admysłovaja mižnarodnaja strachoŭka hramadzianskaj adkaznaści dla aŭtamabilistaŭ, jakija jeduć za miažu na svajoj mašynie. Kaštuje takaja pasłuha jak minimum 30 jeŭra, kali afarmlajeć jaje na 15 dzion. Adpaviedna, kali brać bolšy termin, to i płacić daviadziecca bolš. Aformić «zialonuju kartu» možna ŭ strachaŭščykoŭ prosta pierad miažoj.
Darohi ŭ Litvie biaspłatnyja, a voś za parkoŭki, chutčej za ŭsio, daviadziecca płacić, kali tolki pajezdka nie budzie nu zusim karotkaterminovaj.
BlaBlaCar
Čas: ad 3 hadzin i bolej
Cana: jak pašancuje
Sajt BlaBlaCar isnuje dla ludziej, jakija šukajuć paputčykaŭ sabie ŭ darohu. Naprykład, Mikałaj z Malinaŭki jedzie ŭ Vilniu na svaim aŭto, jon maje dva volnyja miescy i hatovy na ich ŭziać z saboj pasažyraŭ. Dla hetaha jon raźmiaščaje abviestku na sajcie, a achvotnyja ŭ toj samy čas nakiravacca ŭ Litvu znachodziać abjavu i źviazvajucca z kiroŭcam. Ułaśnik aŭto sam vystaŭlaje canu, za jakuju hatovy pieravieźci spadarožnika z punkta A ŭ punkt B. Možna damovicca i na mienšuju canu, kali kiroŭca budzie da vas prychilnym. Z canoj na BlaBlaCar uhadać niemahčyma, prosta sačycie za sajtam, kab nie prapuścić samuju vyhadnuju prapanovu.
Aŭtaspyn ź Minska ŭ Vilniu
Čas: Ad 3 hadzin i bolej
Cana: biaspłatna abo jak pašancuje
Dla samych adčajnych ci biezhrašovych, viadoma, isnuje aŭtaspyn. Aŭtaspyn da Vilni, jak i da luboha inšaha horada, nie maje nijakich harantyj. I prachodzić vyklučna na strach i ryzyku tych, chto «stopić» (dy i chto spyniajecca, naturalna). Mahčyma, mašynu atrymajecca złavić adrazu, a, moža, daviadziecca prastajać pałovu dnia na soncy ci daždžy. Zrešty, zvyčajna aŭtaspynščyki razumiejuć, na što iduć, tamu jany nie schilnyja narakać na pieraškody. Bo jakraz u takim baŭleńni času adčuvajuć kajf ad vandroŭki. Kab pačać stopić mašyny na Vilniu, vam treba vyjechać na hrodzienskuju trasu, jakaja pačynajecca adrazu za Kamiennaj Horkaj.
Dobraj vam vandroŭki ŭ Vilniu! Spadziajomsia, hety horad vas nie rasčaruje.
