Ministra zamiežnych spravaŭ Biełarusi Uładzimira Makieja padčas forumu «Minski dyjałoh» spytali pra niadaŭniuju zajavu MUS ab ściahu ŁHBT-supolnaści nad pasolstvam Vialikabrytanii.
«Źviartajciesia ŭ MUS Biełarusi, chaj jany kamientujuć», — koratka skazaŭ Makiej. Potym jon usio ž vyrašyŭ krychu raźvić svaju dumku.
«Majo mierkavańnie ŭ tym, što luby dziaržaŭny ci palityčny dziejač, lubaja struktura, robiačy zajavy, pavinna dumać ab nastupstvach va ŭsich kirunkach», — skazaŭ Makiej. Heta možna razhladać jak nievialiki ŭkoł MUS, što nie padumaŭ, jakaja budzie reakcyja.
Praŭda, potym Makiej jašče krychu inakš vyrašyŭ vyrulić situacyju. «Ja liču, što my, uzajemadziejničajučy ź jeŭrapiejskim strukturami ŭ halinie pravoŭ čałavieka, pavinny ŭličvać śpiecyfiku i mientalitet taho ci inšaha naroda. Jość šerah rečaŭ, jakija nieprymalnyja dla našaha mientalitetu. Heta tyčycca i Biełarusi, i šerahu inšych krain. Važna nie naviazvać tyja ci inšyja rečy», — adznačyŭ ministr zamiežnych spravaŭ.
Uładzimir Makiej adznačyŭ, što pytańnie mienšaściaŭ vielmi dalikatnaje.
