Smartfony ŭžo čakajuć pieramožcaŭ u redakcyi «Našaj Nivy».
Trojku pretendentaŭ na pieramohu vyznačać viadomaja para biełaruskich fatohrafaŭ Lejdzik + Kanaploŭ, a taksama fatohraf «Našaj Nivy» Siarhiej Hudzilin.
5 maja my spynili pryjom fotazdymkaŭ na konkurs, ale dniami dadałosia jašče adno sełfi. Jaho vykłaŭ Mikałaj Bohdan, praŭnuk 97-hadovaj spadaryni Sierafimy. Jana — adna ź niekalkich žycharoŭ spalenaj u 1943 hodzie vioski Lubiel, jakim udałosia ŭratavacca.
Na hetym pazityŭnym sełfi — vialikaja siamja kolišniaj buchhałtarki ź vioski Vostrava (Słonimski rajon) Aleny Trafimovič. Dla 79-hadovaj Aleny zrabić sełfi — raz plunuć, bo jana i jutub asvoiła, i skajp, i ŭsie naviny ŭ internecie viedaje raniej za dzieda, jaki pa zvyčcy štoviečar uklučaje «Panaramu» na televizary.
Pra Ninu i Paŭła Ivanik my raspaviadali: historyja ich kachańnia, jakaja ciahniecca ŭžo bolš za 50 hod, skaryła sercy mnohich čytačoŭ. Za abnaŭleńnie fotaalbomaŭ u siamji adkazvaje jakraz Nina Alaksandraŭna. A Pavieł Michajłavič sočyć za papaŭnieńniem zapasaŭ miodu, małaka, a ŭ letni siezon — hryboŭ i jahad.
Jašče adna ŭdzielnica konkursu ź imiem Nina sioleta budzie śviatkavać z mužam 65-hodździe sumiesnaha žyćcia! Za hety čas u siamiejnaj pary Masłavych naradzilisia 5 dziaciej, a ŭ tych, u svaju čarhu, — 5 svaich dziaciej i 9 unukaŭ. Para Masłavych — adzinyja pastajannyja žychary vioski Zavaroty na Škłoŭščynie, što raniej była vialikaj i hustanasielenaj. Ale dbańni to pra aharod, to pra kvietki, to pra haściej sumavać im usio nie dajuć.
A heta — Leanid Ściepanienka i Viktar. Roźnica va ŭzroście ŭ dziaduli i ŭnuka — 70 hod! Viktar kaža, što, kali jon byŭ maleńkim, dziadula šmat čamu jaho navučyŭ: i małatok u rukach trymać, i mužnym być. «Dziadula z małatkom na leciščy, i ja maleńki pobač. Razam budavali, razam hulali. Dziadula mnie raspaviadaŭ pra svajo žyćcio, dziacinstva. A jano ŭ jaho było niaprostaje. Kali jamu nie spoŭniłasia jašče i 7 hod, pačałasia Vialikaja Ajčynnaja vajna. Niemcy zachapili ich viosku, dziadula sa starejšaj siastroj trapili ŭ kancłahier, ale im udałosia źbiehčy…». Ciapier pryjšoŭ čas unuku vučyć dziadulu. Leanid Vasiljevič — lohki na padjom, tamu adrazu pahadziŭsia na pieršaje sełfi.
Pahladzieć sełfi ŭsich udzielnikaŭ na staroncy konkursu
