Asłan i Biasłan Irytavy.
Biazruki invalid z Kabardzina-Bałkaryi Asłan Irytaŭ staŭ fihurantam kryminalnaj spravy ab prymianieńni hvałtu ŭ dačynieńni da pradstaŭnika ŭłady (artykuł 318 KK), tamu što «schapiŭ palicejskaha za šyju kiściami abiedźviuch ruk i zdušvaŭ palcy ruk u vobłaści šyi». Pra heta havorycca ŭ materyjałach spravy suprać Irytava i jaho brata Biesłana, paviedamlaje «Kamitet suprać katavańniaŭ».
Sprava suprać Irytavych raspačata piać miesiacaŭ tamu.
«Śledčych pa-raniejšamu nie biantežać surjoznyja razychodžańni ŭ pakazańniach supracoŭnikaŭ palicyi ź videazapisam incydentu. Jość i prosta absurdnyja vysnovy, što invalid Asłan Irytaŭ, u jakoha adsutničajuć kiści ruk, nibyta dušyŭ imi palicejskaha, pry hetym ściskajučy jamu šyju palcami. I hetyja vysnovy śledstva dziŭnym čynam zadavolili prakuraturu», — adznačyŭ juryst arhanizacyi Mahamied Ałam.
31 kastryčnika 2017 hoda siłaviki źbili ŭsiu ich siamju ŭ dvary ŭłasnaha doma ŭ Nalčyku. U toj dzień palicyjanty ŭ formie i cyvilnym pryjšli da ich i zapatrabavali vyvieści na vulicu haspadara. U adkaz dačka i žonka Asłana Irytava zapatrabavali pradjavić dakumienty, a jaho brat Biesłan aburyŭsia, što pilicyjanty zdymali ich dvor na kamieru, i pasprabavaŭ prahnać. Invalid doŭha apranaŭsia, i kali narešcie vyjšaŭ na dvor, tudy ŭžo zabiehli ŭzbrojenyja ludzi ŭ maskach. Jany źbili haspadara z noh i pavalili na ziamlu, ad čaho toj stuknuŭsia hałavoj ab bardziur, a potym prycisnuli jaho hałavoj da asfaltu i ścisnuli horła. Pa słovach siamji, pakul jon lažaŭ, jaho niekalki razoŭ udaryli pa hałavie i pa ciele. Jaho brata ŭdaryli ŭ skroń, skrucili, i abodvuch paciahnuli ŭ mikraaŭtobus. Pa darozie Biasłanu złamali rabro, a Asłana vypuścili i ciahnuli pa ziamli.
U adździele palicyi Biasłanu Irytavu stała drenna, i jamu vyklikali «chutkuju». Lekary dyjahnastavali ŭ jaho ŭdary, zapadozryli pierałom i zapatrabavali adpravić mužčynu ŭ traŭmapunkt. Paźniej bratoŭ adpuścili.
U vyniku bojki ŭ žonki haspadara Maryny Irytavaj byŭ złamany palec na ruce. Ich dačku Anžaliku ŭ dvary ŭdaryli tvaram ab ziamlu i paškodzili nos. Paśla zvarotu siamji ŭ Śledčy kamitet bratoŭ Irytavych abvinavacili ŭ napadzie na palicejskich, a ŭ dziejańniach apieratyŭnikaŭ śledčy nie ŭhledzieŭ ničoha supraćpraŭnaha.
