Paśla pažaru ŭ handlovym centry ŭ Kiemieravie ŭ Biełarusi pačalisia masavyja pravierki padobnych abjektaŭ — praviarajuć šlachi evakuacyi, sistemy pažaratušeńnia i h.d.
Adrazu ž niekatoryja śpiecyjalisty i ŭładalniki handlovych centraŭ pačali kazać, što pažary takoha ž maštabu, jak u Kiemieravie, u Biełarusi prosta niemahčymyja.
U pryvatnaści, izrailski inžynier-budaŭnik Sierž Alpern u intervju «Svabodzie» adznačyŭ:
«Dumaju, što [taki pažar, jaki zdaryŭsia ŭ rasijskim Kiemieravie, u Biełarusi paŭtarycca — red.] nie moža. Tam adbyŭsia ceły łancužok parušeńniaŭ, jakija pryviali da hetaj trahiedyi. Dastatkova, kab u hetym łancužku choć adno źviano vypała, i tady trahiedyja nie adbyłasia b u takich maštabach.
Kali kazać pra Biełaruś, to tut davoli surjozny kantrol dziaržaŭnych orhanaŭ. Jaho viadzie i Dziaržbudnahlad, i pažarnaja inśpiekcyja na samych roznych uzroŭniach i etapach prajekta. Pačynajecca ŭsio z pravierki prajektnaj dakumientacyi na stadyi zvarotu zabudoŭščyka pa dazvoł na budaŭnictva. Hetym zajmajecca Dziaržbudnahlad. Aproč jaho, praviarajuć roznyja instancyi pažarnaj inśpiekcyi».
I sapraŭdy, u śviadomaści biełarusaŭ jość mierkavańnie, što z-za mienšych maštabaŭ karupcyi i bolš efiektyŭnaj pracy pažarnych słužb situacyja z pažarnaj biaśpiekaj u Biełarusi značna lepšaja, čym u susiednich Rasii ci Ukrainie.
Ale kali pahladzieć na statystyku Mižnarodnaj asacyjacyi supraćpažarnych i vyratavalnych słužb, pakazčyki Biełarusi siarod najhoršych.
U pryvatnaści, u spravazdačy asacyjacyi pryvodziacca dadzienyja za 2015 hod pa adnosnaj kolkaści achviar na 100 tysiač nasielnictva i na 100 pažaraŭ.
Kali hladzieć na kolkaść śmierciaŭ u pieraliku na 100 tysiač nasielnictva, tut situacyja niaradasnaja. Horš tolki ŭ Rasii.
Kolkaść śmierciaŭ na pažarach na 100 tysiač nasielnictva, statystyka Mižnarodnaj asacyjacyi supraćpažarnych i vyratavalnych słužb za 2015 hod.
Pa kolkaści achviar na 100 pažaraŭ u Biełarusi najhoršyja pakazčyki siarod 31 krainy — 7,9 śmierci na 100 pažaraŭ. Tut u nas usio navat horš, čym u Rasii ci Ukrainie.
Siaredniaja kolkaść śmierciaŭ na pažarach na 100 pažaraŭ, statystyka Mižnarodnaj asacyjacyi supraćpažarnych i vyratavalnych słužb za 2015 hod.
