Fota Maksima Laško
Unučataja plamieńnica Ivana i Antona Łuckievičaŭ Marharyta Piarova, jakaja žyvie ŭ Sankt-Pieciarburhu, u interviju Siarhieju Abłamiejku na radyjo «Svaboda» raskazała, chto i jak spryčyniŭsia da ŭstanoŭki pamiatnaha kamienia z šyldaj u parku imia Janki Kupały ŭ Miensku.
— Marharyta, chto maje dačynieńnie da ŭstanoŭki pamiatnaha kamienia?
— Razmovy pra kampramis pamiž kamitetam BNR100 i ŭładami ŭ spravie ŭstalavańnia pamiatnaha kamienia nie adpaviadajuć sapraŭdnaści. Arhkamitet BNR100 nia maje nijakaha dačynieńnia da pomnika.
Usio heta rabiłasia ahulnymi namahańniami naščadkaŭ Łuckievičaŭ, Muzeju imia Janki Kupały, ZBS «Baćkaŭščyny», Ministerstva zamiežnych spraŭ i deputataŭ Pałaty pradstaŭnikoŭ. Vykanaŭca hetaha pomnika — Mienski haradzki vykanaŭčy kamitet. Mienharvykankam i finansavaŭ usiu spravu.
— Chto inicyjavaŭ ustanoŭku pamiatnaha kamienia z šyldaj?
— Inicyjatyva była jašče piać hadoŭ tamu. Ad imia naščadkaŭ Łuckievičaŭ, raskidanych pa ŭsim śviecie, ja źviarnułasia da Ministerstva kultury i da Mienharvykankamu. Pakolki ja žyvu za miažoj, usia sprava zaciahnułasia.
Niekalki razoŭ my atrymlivali admovy. Spačatku byli niapravilna aformlenyja papiery. Potym, u 2014 hodzie, Ministerstva kultury admoviła z toj pryčyny, što heta nia maje dačynieńnia da kupałaŭskaj tematyki ŭ parku Janki Kupały. Ale Muzej Janki Kupały zapiarečyŭ, bo na dumku muzejnych supracoŭnikaŭ, pamiatny kamień z šyldaj paspryjaŭ by ekskursijnym maršrutam, jakija arhanizoŭvaje muzej.
I voś paśla VII źjezdu biełarusaŭ śvietu, kali vielmi dobra vystupiŭ ministar zamiežnych spraŭ Uładzimier Makiej, jaki kazaŭ pra patrebu viartać kaštoŭnaści na radzimu, mnie zdałosia, što ciapier trochu źmianilisia časy i možna pasprabavać znoŭ padać papiery u Ministerstva kultury i harvykankam.
Vielmi padtrymaŭ i deputacki korpus. Papiery znoŭ byli padadzienyja ad kalektyvu zajaŭnikaŭ, u tym liku ad Muzeju imia Janki Kupały, ad ZBS «Baćkaŭščyna», ad naščadkaŭ Łuckievičaŭ. Papiery ja znoŭ padała ŭ žniŭni 2017 hodu, a ŭ śniežni ŭžo padała całkam aformlenyja pavodle patrebnaha ŭzoru.
Tam byŭ užo i zvarot MZS Biełarusi da Mienharvykankamu, tam byŭ i moj zvarot da deputackaha korpusu i da Ministerstva kultury. U studzieni 2018 hodu dazvoł byŭ dadzieny.
— Davajcie jašče raz udakładnim. Chto ŭrešcie finansavaŭ ustanoŭku pamiatnaha kamienia z šyldaj?
— U zvarocie Ministerstva zamiežnych spraŭ da Mienharvykankamu ŭtrymlivałasia prośba znajści hrošy na ŭstanoŭku pamiatnaha kamienia. Padtrymaŭ i deputacki korpus Pałaty pradstaŭnikoŭ
U vyniku vykanaŭcam usioj spravy staŭ Mienski haradzki vykanaŭčy kamitet — jon finansavaŭ prajekt i ŭstanoŭku. Usio zroblena za košt Mienharvykankamu.
— A chto stvaryŭ prajekt pamiatnaha kamienia z šyldaj?
— Ja šukała architektara i skulptara. Zhadziŭsia viadomy architektar Jury Hradaŭ. 27 studzienia adbyłosia pasiedžańnie architekturnaj rady, na jakim i byŭ zaćvierdžany prajekt. I voś tak chutka ŭsio było zroblena. Dziakuj vialiki ŭsim, chto spryčyniŭsia da hetaj spravy.
