Prahrama Skype, jakoj mnohija biełaruskija žurnalisty dy aktyvisty hramadzkich i palityčnych abjadnańniaŭ karystajucca nie tolki tamu što zručna, a tamu što biaśpiečna, čarhovy raz trapiła ŭ skandał.
Na hety raz jość dokazy, kab pierakanacca, što prahrama nie takaja nadziejnaja, jak pryniata ličyć. Padozrańni skieptykaŭ, jakija nie daviarajuć zakrytamu prahramnamu kodu Skype, spraŭdzilisia praŭda pakul tolki dla Kitaju. Kanadzkija daśledniki vyjavili, što ŭsie palityčnyja razmovy kitajcaŭ praz admysłovuju kitajskuju versiju Skype adsočvajucca i zachoŭvajucca na vaśmi serverach.
Papularnaja prahrama VoIP‑telefanii i abmienu imhniennymi paviedamleńniami dziejničaje ŭ Kitai ŭ vyhladzie sumiesnaha pradpryjemstva pamiž Skype i miascovaj kampanijaj TOM Online. Adpaviedna isnuje kitajskaja versija prahramy, jakaja nazyvajecca Tom‑Skype — mienavita jaje i daśledavali kanadcy.
Pradstaŭniki Skype ŭ kamentary da daśledavańnia zajavili, što nia treba ździŭlacca manitorynhu paviedamleńniaŭ u Kitai, bo kampanija dziejničaje tam u adpaviednaści ź miascovymi zakonami.
Adnak kanadzkija daśledniki zdoleli atrymać dostup da serveraŭ, na jakich zachoŭvajucca palityčnyja razmovy kitajcaŭ, piša WSJ. Jany padkreślivajuć, što hihanckaja schiema špijanažu za kitajskim karystalnikami Skype — heta tolki pałovy biady. Druhaja jaje častka składajecca ŭ niedastatkovaj abaronie kamunikacyjnych serveraŭ, słabych alharytmach šyfravańnia dadzienych i mahčymaści atrymańnia schavanych łohaŭ addalena, čym mohuć skarystacca nia tolki zakazčyki hetaj systemy ŭ Piekinie, ale i chakiery, jakija handlujuć persanalnymi dadzienymi.
Kampanija Skype rehularna traplaje ŭ skandały z abvinavačvańniami ŭ špijanažy. Adnak usie paviedamleńni pra najaŭnaść u prahramie ščylinki, jakaja daje mahčymaść padsłuchoŭvać razmovy, dahetul nia byli paćvierdžanyja publična.
Taki składany imidž Skype źviazany z tym, što kod prahramy nia bačyŭ nichto, akramia jaje stvaralnikaŭ i raspracoŭščykaŭ. A pabudavanaja jana z vykarystańniem šmatlikich chakierskich technalohijaŭ i prydumak, jakija nie dazvalajuć dekadavać alharytm prahramy, jak toje robicca časta z praduktami inšych kampanijaŭ.
Hałoŭnaja prablema zaklučajecca ŭ tym, što vierahodnaść raskryćcia kodu Skype usio ž isnuje. I nie mahčyma być całkam upeŭnienym, što ŭ specsłužbaŭ, albo chakieraŭ heta jašče nie atrymałasia.
Značna bolš nadziejnymi dla biaśpieki razmovaŭ u Siecivie źjaŭlajucca prahramy i pratakoły pabudavanyja na adkrytym zychodnym kodzie. U hetym vypadku ŭ luboha prahramista jość mahčymaść pravieryć ich i być upeŭnienym, što ŭ alharytmie adsutničajuć admysłovyja ščylinki i vypadkovyja dzirki. Adnoj z samych papularnych technalohijaŭ takoha kštałtu źjaŭlajecca jabber, na jakim pracuje, naprykład, google talk.
