Abraz, jaki datujecca XIX stahodździem, trapiŭ Muziej staražytnabiełaruskaj kultury NAN z kaścioła ŭ Kobrynie. Heta kopija cudatvornaj Vastrabramskaj ikony Božaj Maci, jakaja znachodzicca ŭ Vilni, — raniejšaj stalicy Vialikaha Kniastva Litoŭskaha. Raźmieščany abraz u katalickaj kaplicy nad Vostraj Bramaj — varotami ŭ haradskoj ścianie na vyjeździe ŭ bok Minska, z-za čaho i atrymała svaju nazvu.
Vastrabramski abraz maje asablivaje značeńnie jak dla katalikoŭ, tak i dla pravasłaŭnych ludziej, zdaŭna šanujecca jak cudadziejny. Adnoj z kopij i źjaŭlajecca abraz z fondaŭ Muzieja staražytnabiełaruskaj kultury.
Asablivaściu ikanahrafii hetych tvoraŭ źjaŭlajecca toje, što Maci Božaja tut vyjaŭlena adna, bieź niemaŭla. Mahčyma, ikanapisiec imknuŭsia pakazać Dzievu Maryju ŭ toj momant, kali ź niabiosaŭ spuściŭsia Archanhieł Haŭryił i prynios viestku pra toje, što ŭ jaje narodzicca niemaŭla Isus.
Pra historyju cudadziejnaha abraza Maci Božaj Vastrabramskaj raskaža dyrektar Muzieja staražytnabiełaruskaj kultury NAN, kandydat mastactvaznaŭstva Barys Łazuka.
Vystava adnaho dnia ŭžo stała tradycyjnym mierapryjemstvam Vialikaha teatra, jakoje arhanizujecca sumiesna z muziejem. Praciahnie hety niezvyčajny viečar balet «Straści (Rahnieda)» Andreja Mdzivani (chareahrafija Valancina Jelizarjeva, scenahrafija i kaściumy Viačasłava Akuniova).
Śpiektakl raspaviadaje pra padziei tysiačahadovaj daŭnaści, ab staražytnym Połacku i kniazioŭnie Rahniedzie.
Viadučyja partyi ŭ śpiektakli vykanajuć: zasłužany artyst Biełarusi Anton Kraŭčanka (Uładzimir), zasłužanaja artystka Biełarusi Iryna Jaromkina (Rahnieda), narodny artyst Biełarusi Ihar Artamonaŭ (Jarapołk), uładalnik miedala Francyska Skaryny Hanna Fokina (Hanna). Dyryžor — Aleh Lasun.
