Za śpiekulacyju biletami na matč futbolnaj Lihi čempijonaŭ BATE (Barysaŭ) — «Juvientus» (Turyn), jaki adbudziecca 30 vieraśnia na minskim stadyjonie «Dynama», zatrymany čatyry studenty staličnych VNU.
Pra heta BiełaPAN paviedamiŭ načalnik adździaleńnia infarmacyi i hramadskich suviaziej HUUS Minharvykankama Alaksandr Łastoŭski.
Maładyja ludzi zahadzia nabyli ŭ kasach «Dynama» bilety za 30 tys. rubloŭ, a zatym sprabavali realizavać ich za 150 tys.U dačynieńni da studentaŭ składzieny administracyjnyja pratakoły na padstavie č. 1 art. 12.7 KoAP (niezakonnaja pradprymalnickaja dziejnaść).
Śpiekulanty byli zatrymany ŭ čas rejdaŭ, praviedzienych supracoŭnikami ŭpraŭleńnia pa baraćbie z karupcyjaj i ekanamičnymi złačynstvami HUUS Minharvykankama sumiesna z haradskimi padraździaleńniami Ministerstva pa padatkach i zborach.
Pavodle infarmacyi HUUS, na pieršy damašni matč barysaŭskaha kłuba z «Juvientusam» bilety dla prodažu byli raźmierkavany nastupnym čynam: pryblizna 30 % realizoŭvałasia praz kasy «Dynama», stolki ž pastupiła ŭ prodaž praz kasy barysaŭskaha stadyjona. Prykładna 35 % biletaŭ było vydadziena dla realizacyi arhanizacyjam pa bieznajaŭnym raźliku i kala 5 % — dla realizacyi italjanskim zaŭziataram.
HUUS Minharvykankama nahadvaje, što niezakonnaja pradprymalnickaja dziejnaść ciahnie nakładańnie štrafu na fizičnuju asobu ad 10 da 50 bazavych vieličyń (350 tys. - 1 młn 750 tys.) z kanfiskacyjaj dachodu, što atrymany ŭ vyniku takoj dziejnaści; na indyvidualnaha pradprymalnika — ad 10 da 200 bazavych vieličyń z kanfiskacyjaj dachodu, što atrymany ŭ vyniku takoj dziejnaści, abo pazbaŭleńnie prava zajmacca peŭnaj dziejnaściu; na jurydyčnuju asobu — da 500 bazavych vieličyń z kanfiskacyjaj dachodu, što atrymany ŭ vyniku takoj dziejnaści, abo pazbaŭleńnie prava zajmacca peŭnaj dziejnaściu.