Na dniach u internecie źjaviŭsia siužet telekanała «Biełsat», u jakim razhnievanyja žychary Śvietłahorska i rajona patrabavali vyrašyć situacyju sa smurodam. Jon utvarajucca «dziakujučy» novaj vytvorčaści Śvietłahorskaha celułozna-kardonnaha kambinata.
U suviazi z hetym žurnalisty «Homielskaj praŭdy» zadali dyrektaru AAT «Śvietłahorski celułozna-kardonny kambinat» Juryju Kruku niekalki pytańniaŭ.
— Naša pradpryjemstva adpaviadaje samym vysokim suśvietnym standartam ekałahičnaj biaśpieki. Kampanija, jakaja pastaŭlała nam usio technałahičnaje abstalavańnie, — heta najbujniejšy suśvietny vytvorca.
Hetaja kampanija pracuje z pradpryjemstvami padobnaha kštałtu i ŭ Paŭdniovaj Amierycy, i ŭ Paŭdniova-Uschodniaj Azii, dzie budujucca zavody pa vytvorčaści celułozy mahutnaściu da dvuch miljonaŭ ton u hod. Naš zavod mahutnaściu 400 tysiač ton. Praduhledžana pierapracoŭka jak liścianaj, tak i chvojnaj draŭniny.
Vychad pradpryjemstva na poŭnuju mahutnaść dazvolić skaracić impart. Heta vielmi vyhadny i ambicyjny prajekt. Akramia taho, pry jaho raspracoŭcy byli ŭličany normy vielmi žorstkaha biełaruskaha pryrodaachoŭnaha zakanadaŭstva.
— A jano sapraŭdy žorstkaje? Abo na fonie suśvietnych standartaŭ nie nadta?
- Što značyć nie nadta? Našy normy ŭ hetaj halinie navat bolš žorstkija, čym u Jeŭrapiejskim sajuzie. Naprykład, pa skidach ŭ vodnaje asiarodździe, pa pakazčykach chimičnaha i bijałahičnaha spažyvańnia kisłarodu. Heta śviedčyć ab tym, što prajekt biaśpiečny.
— Čamu tady žychary vioski Jakimava Słabada čujuć rezki niepryjemny pach?
— Hetaja vytvorčaść pry zapusku, puska-naładačnych rabotach zaŭsiody, akcentuju, zaŭsiody, supravadžajecca vyłučeńniem arhaničnych rečyvaŭ z drennym pacham. Pach, sapraŭdy niepryjemny, nahadvaje tuchłuju kvašanuju kapustu. Adnak prajektam praduhledžana utylizacyja hetych rečyvaŭ z dapamohaj sodarehienieracyjnaha katła, u jaki jany buduć pastupać i spalvacca. Heta adziny sposab baraćby z takoj prablemaj.
— Hetyja vykidy taksičnyja?
- Nie. Na šmatlikich rasijskich vytvorčaściach padobnaha typu naohuł nie praduhledžany sodarehienieracyjnyja katły, jakija b likvidavali hetyja rečyvy z drennym pacham. Ale tym nie mienš tam zavody pracujuć. U nas ža ja abiacaju žycharam Śvietłahorska i rajona, što pach syjdzie. Da kanca studzienia dakładna.
— I ŭsio ž taki, ludzi mohuć atrucicca tymi kancentracyjami, jakija jość u pavietry, ci nie?
— Na siońnia my paćviardžajem, što kancentracyja biaśpiečnaja dla žycharoŭ. Ludziam ničoha nie pahražaje.
— Značyć, nazyvać viosku Jakimava Słabada «dalinaj śmierci», jak heta zroblena ŭ telesiužecie, nie dakładna?
- Heta, miakka kažučy, niapravilna. Bolš za toje, skažu, što šmat chto z žycharoŭ vioski pracujuć u nas na pradpryjemstvie, zadavolenyja novym pracoŭnym miescam. Zavod u cełym atrymaŭ šturšok dla mahutnaha raźvićcia ŭ budučyni. A časovyja ciažkaści, jakija ŭźnikli, pieraadolnyja i chutka buduć likvidavany.
Užo vypuščana pieršaja tysiača ton tavarnaj celułozy, adhružanaja biełaruskim spažyŭcam — Škłoŭskamu zavodu hazietnaj papiery, Dobrušskaj fabrycy «Hieroj pracy» i inšym.