21 śniežnia ŭ vioscy Novy Dvor namieśnik načalnika hrodzienskaj milicyi Alaksandr Šastajła sustrakaŭsia ź ludźmi. Bolš za ŭsio prysutnych cikaviła, što sa źnikłym jašče ŭ vieraśni chłopčykam?
Nahadajem, 16 vieraśnia Maksim Marchaluk, chłopčyk ź vioski Novy Dvor, vyjšaŭ pahulać i źnik. Masavyja pošuki z udziełam milicyi, ratavalnikaŭ i vałancioraŭ plonu nie dali. U vyniku Śledčy kamitet zavioŭ kryminalnuju spravu.
Šastajła paviedamiŭ, što pošuki praciahvajucca. U zonie pošukaŭ vakoł Novaha Dvara staranna pravieryli ŭsio, kab być upeŭnienymi, što cieła niama. Taksama milicyja adpracavała niekalki tysiač čałaviek, ale biezvynikova.
Alaksandr Šastajła padkreśliŭ: vykarystoŭvalisia ŭsie mahčymyja mietady. Na miesca pošukaŭ pryvozili navat ekstrasensaŭ, jakija źviartalisia ŭ milicyju, zajaŭlajučy, što dapamohuć. Ale iznoŭ ža — plonu nie było.
Asabliva Šastajła paprasiŭ nie raspaŭsiudžvać čutki i niepraŭdzivuju infarmacyju, bo heta i pieraškadžaje pracy milicyi, i ranić baćkoŭ źnikłaha chłopčyka.
