Pravaabaroniec-viasnoviec Valancin Stefanovič prysutničaŭ na pieršym dni na pracesie nad publicystami Juryjem Paŭłaŭcom, Dźmitryjem Alimkinym i Siarhiejem Šyptenkam. Jon padzialiŭsia svaimi ŭražańniami ad ubačanaha.
«Mova varažniečy tam prysutničaje. Asabliva ŭ Alimkina. Ja b nie skazaŭ, što heta raspalvańnie varožaści. A voś pa Paŭłaŭcu i Šyptenku — tam šmat histaryčnych faktaŭ, jakija možna aceńvać pa-roznamu. Za heta ž u turmu nie sadžajuć. Prypisvajuć biełaruskich dziejačoŭ polskaj kultury — nu chaj prypisvajuć. A jašče mianie paviesialili «amierykanski śviet» i «niamiecki śviet», tolki ja tak i nie zrazumieŭ, jak jany da ich varažnieču raspalvali.
Kali karystacca kłasifikacyjaj «Artykl 19», to jany razhladajuć try typy movy varožaści: 1. Žorstkaja, jakaja musić być kryminalizavanaja, kali tam jość kankretnyja zakliki da hvałtoŭnych dziejańniaŭ u dačynieńni da peŭnaj hrupy; 2. Siaredniaja, za jaje moža być vyniesienaje papiaredžańnie; 3. Mova varažniečy, jakaja abaraniajecca svabodaj vykazvańnia mierkavańniaŭ, za jakuju nielha pryciahvać da adkaznaści.
Usie ichnija razvahi adnosna biełaruskaj nacyi: jość jana, ci niama jaje. Voś Palčys niekali toje samaje pisaŭ pra rasijskuju, ci isnuje jana, kali rabiŭ analiz farmavańnia ruskaj nacyi. I jon prychodziŭ da vysnovy, što jaje niama. I što? Za heta ŭ turmu sadžać? Nie!
Na słych mnie rezanuła, što Alimkin apisvaŭ biełaruskamoŭnuju hrupu jak prykmietu niepaŭnavartnasnaści. Maŭlaŭ, jana maje nizki sacyjalny status.
Što tyčycca «niedadziaržavy», to abrazić dziaržavu nielha. Kali b jon napisaŭ, što biełarusy «niedaludzi», tady b heta byŭ kłasičny vypadak movy varožaści, jaki ciahnie za saboj adkaznaść. Nu razvažaje jon tak, chaj razvažaje. Najlepšym adkazam tut było b umacavańnie niezaležnaści Biełarusi».
***