Staršynia Centrvybarkama Lidzija Jarmošyna patłumačyła svajo staŭleńnie da zaŭvah i prapanoŭ da vybarčaj sistemy. Jaje mierkavańnie apublikavanaje ŭ haziecie «Respublika».
Lidzija Jarmošyna. Fota Siarhieja Hudzilina.
— Lidzija Michajłaŭna, a jak za apošnija hady mianialisia pretenzii i zaŭvahi da vybaraŭ u krainie z boku ABSIE?
— Tut pačać treba z taho, što z 2000 hoda naša vybarčaje zakanadaŭstva nieadnarazova źmianiałasia, adpaviedna, mnohija zaŭvahi ABSIE zadavolenyja. Akramia taho, u ABSIE taksama mianiajucca praktyka i pohlady na tyja ci inšyja rečy. Heta źviazana nie tolki ź ich staŭleńniem da Biełarusi, ale i ź mižnarodnym vopytam, ź situacyjaj u krainach, dzie adbyvajucca peŭnyja kanflikty. Bolš za toje, mnohija z rekamiendacyj ABSIE niemahčyma vykanać: časam jany prosta uzajemavyklučajuć adzin adnaho.
Akramia taho, ABSIE nie zaŭsiody ŭličvaje miascovyja tradycyi. Naprykład, jany pa-raniejšamu razhladajuć usie vybarčyja pracesy z punktu hledžańnia ŭdziełu partyjaŭ, a ŭ nas mažarytarnaja vybarčaja sistema i partyi marhinalnyja, jany mała ŭdzielničajuć u vybarach i nie ŭpłyvajuć na ich vyniki. Našy partyi bolš stvarajuć šum, a nie ŭpłyvajuć na vybarščykaŭ.
Abo ŭziać choć by takoje paniaćcie, jak «karupcyja». My zaŭsiody ličyli, što ŭ palitycy karupcyja — heta niejkija niaŭličanyja hrošy, a jany zaraz nazyvajuć karupcyjaj pierš za ŭsio ŭmiašalnictva dziaržorhanaŭ ŭ vybarčy praces. Viadoma, my z hetym nikoli nie pahodzimsia.
