Pazaŭčorašniaja trahičnaja avaryja pad Žytkavičami, u jakoj zahinuli troje maładych chłopcaŭ, zabrała žyćcio i 18-hadovaha syna «ahurkovaha karala» ź vioski Alšany Bresckaj vobłaści, paviedamlaje Gomel.today.
Fota ź miesca avaryi — Śledčy kamitet
Mienavita jamu naležaŭ aŭtamabil «Miersiedes», na jakim try padletki vylecieli ŭ kiuviet i ŭrezalisia ŭ dreva, paśla čaho mašyna pierakuliłasia. Usie troje zahinuli, bo nie byli pryšpilenyja ramianiami biaśpieki.
Śledčy kamitet vyśviatlaje, chto ž znachodziŭsia za rulom aŭto ŭ momant avaryi. Sprava ŭ tym, što paśla sutyknieńnia z drevam usie troje vylecieli z sałona.
18-hadovy ŭładalnik aŭto byŭ adzinym siarod traich zahinułych, jaki nie mieŭ pravoŭ. U abodvuch jaho siabroŭ pravy byli. Usie troje zahinułych pad Aziaranami maładych ludziej žyli ŭ vioscy Alšany Stolinskaha rajona Bresckaj vobłaści.
Hety nasieleny punkt vydatna viadomy nie tolki ŭ Biełarusi, ale i daloka za jaje miežami. Alšany nazyvajuć «ahurkovaj stalicaj». Sprava ŭ tym, što miascovyja žychary, bolšaść jakich — pratestanty (nie ŭžyvajuć ałkahol, majuć šmatdzietnyja siemji), masava zajmajucca fiermierskim biznesam, pieravažna vyroščvańniem ahurkoŭ.
Fiermierskaja haspadarka «Alšany», što naležyć Ivanu Hrybu, pra jakuju idzie havorka, — adna z najbujniejšych u Biełarusi, maje ŭ karystańni 262 ha ziamli, sučasnuju techniku, a taksama schovišča dla harodniny na 2000 ton pradukcyi i chaładzilnaje abstalavańnie. Nievypadkova siamju Hrybaŭ na Paleśsi i ŭ ŚMI nazyvajuć «ahurkovymi karalami».
