Aficyjnaje adkryćcio zavoda pa vytvorčaści aŭtamabilaŭ Geely, jakoje niekalki razoŭ pieranosiłasia, adbudziecca zaŭtra, 17 listapada, paviedamlaje Tut.by Zavod pavinien byŭ adkrycca jašče 1 studzienia. U lipieni navat pačali vypuskać probnyja partyi, ale ŭračystaje adkryćcio z razrazańniem stužački pieranieśli na kaniec hoda.
Pieršyja asobniki aŭtamabilaŭ Geely, pavodle słovaŭ ministra pramysłovaści Vitala Voŭka, mohuć źjavicca ŭ prodažy ŭžo ŭ listapadzie.
Na pieršym etapie z kanviejera buduć źjazdžać 60 tysiač aŭtamabilaŭ u hod ź pierśpiektyvaj pavieličeńnia mahutnaściaŭ da 120 tysiač. Zavod budzie vyrablać aŭtamabili Geely ŭ asnoŭnym dla rasiejskaha rynku. Na novym zavodzie «BiełDžy» buduć vypuskać dva krasoviery Geely — NL 3 i NL 4, i kampaktny siedan. Jak miarkujecca, pieršym z kanviejera novaha pradpryjemstva sydzie fłahmanski krosovier Geely Atlas.
Geely Atlas
Da hetaha pradpryjemstva «BiełDžy» zajmałasia tak zvanaj adviortkavaj zborkaj aŭtamabilaŭ Geely. U minułym hodzie na płoščach zavoda «Aŭtahidraŭzmacnialnik» u Barysavie było vyrablena kala 5 tysiač mašyn. Tut źbirali siedany Geely SC7, Emgrand 7, Emgrand GT i krossovier Emgrand X7.
Biełaruska-kitajskaje SZAT «BiełDžy», jakoje vypuskaje lehkavyja aŭtamabili pad markaj Geely, stvoranaje ŭ 2011 hodzie. U lutym 2013 hoda na pradpryjemstvie byŭ sabrany pieršy aŭtamabil.
Akcyjanierami «BiełDžy» źjaŭlajucca AAT «BiełAZ» (51,49%), Zhejang Jirun Automobile Co., Ltd (33,47%), SZAT «Sajuzaŭtatechnałohii» (9,01%) i CITIC International Investment Limited (6,03% ). U 2015 hodzie pamiž Barysavam i Žodzina pačałosia budaŭnictva novaj placoŭki pa vypusku aŭtamabilaŭ. Dla realizacyi prajekta byŭ vydzieleny kitajski kredyt na 158,7 młn dalaraŭ. Ahulny ž abjom inviestycyj składzie 400 młn jeŭra.
Cenaŭ novych madelaŭ na sajcie kampanii pakul niama. Najbolej śviežaja madel krasoviera Geely Emgrand X7 NEW kaštavała ŭ dystrybjutaraŭ ad 27 570 rubloŭ u bazavaj kamplektacyi.
