Kiraŭnica pres-słužby «Jandeksa» Natalla Žuraŭlova paviedamiła, što «Jandeks.Dyrekt» pačaŭ padtrymlivać biełaruskuju movu ŭ rekłamnych abviestkach.
«Dadańnie biełaruskaj było pradyktavana, pierš za ŭsio, popytam siarod rekłamadaŭcaŭ, jaki značna vyras. My vyrašyli, što čas nadyšoŭ», — skazała jana.
Biełaruskaja mova stała piataj paśla ruskaj, tureckaj, anhlijskaj i ŭkrainskaj, na jakoj «Jandeks.Dyrekt» prymaje abviestki.
Z techničnaha punktu hledžańnia dadańnie novaje movy ŭ partał — praciahły i zatratny praces. «Kab ałharytm maderacyi moh aŭtamatyčna prymać abviestki na biełaruskaj movie (naprykład, vyjaŭlać pamyłki ŭ słovach), nam daviałosia «navučyć» jaho movie. A heta vielmi resursajomistaja techničnaja praca, na jakuju ŭ nas syšło niekalki miesiacaŭ», — raspaviała Natalla Žuraŭlova.
U kampanii spadziajucca, što dziakujučy novaj funkcyi, rekłamadaŭcy zmohuć achapić jašče bolšuju aŭdytoryju.
«Jandeks.Dyrekt» — sistema kantekstnaje anłajn-rekłamy ad rasijskaj karparacyi «Jandeks», dziakujučy jakoj vy možacie bačyć rekłamu mienavita tych rečaŭ, jakimi vy cikavilisia apošnim časam. U Biełarusi «Jandeks.Dyrekt» źjaŭlajecca asnoŭnym kankurentam padobnaj sistemy AdWords ad Google.
Jak śćviardžajuć daśledčyki rynku, Biełaruś źjaŭlajecca ŭnikalnaj krainaju, u jakoj doli abiedźviuch najbujniejšych sistem kantekstnaj rekłamy — «Jandeks.Dyrekt» i «Google AdWords» prykładna roŭnyja.
Čytajcie taksama: Jak heta pracuje: servis Jandeks.Probki. Repartaž z ofisa «Jandeksa» ŭ Minsku
