U cichaj i zabytaj Biełarusi zasnoŭvajecca štab-kvatera karparacyi «Niepahasny śviet», jakaja vybiraje emblemaj čorny kvadrat i maje metaj ni bolš ni mienš — dać usiamu čałaviectvu ščaście: kožnamu — pult ad samoha siabie, svaich pačućciaŭ, nastrojaŭ i bolu.
Zorka «Niepahasnaha» Andrej Biełazor, jahonaja kachanaja Volha Vasileŭskaja i tajamničy hienij Čornaha kvadratu Cimur u navahodniuju noč traplajuć u hałavakružny vir padziejaŭ z udziełam vyšejšych słužbovych asobaŭ Biełarusi, mižnarodnaha kapitału dy viernikaŭ-chryścijanaŭ: jevanhielskaha pastara Lva Kalady, probašča Kaścioła Śviatoha Rocha Piatra Harnastaja i pravasłaŭnaha anarchista Jana Jasnaha.
Pastupova robicca zrazumieła, što i ŭ Boha, i ŭ djabła hrandyjoznyja płany adnosna Biełarusi. Kraina pieratvarajecca ŭ pole epičnaj bitvy ź vidam na Apakalipsis.
U čaćvier 16 listapada ŭ Miensku, u kanhres-chole hatela «Viktoryja» (Pieramožcaŭ, 59), projdzie vialikaja prezientacyja ramana Paŭła Sieviarynca «Biełarusalim».
Sieviaryniec pisaŭ «Biełarusalim» 12 hadoŭ, u tym liku ŭ śledčym izalatary KDB «Amierykanka», na sutkach Akreścina, u ssyłkach u Małym Sitnie dy Kuplinie. Pieršaja kniha ramana abjomam kala 400 staronak nazyvajecca «Biełarusalim. Zołak». Miescy dziejańnia — Miensk, Kijeŭ, Połack.
Takim čynam, «Biełarusalim» — raman pra toje, što toić u sabie Biełaruś.
Miensk. Vialikaja zala. Žyvaja muzyka. Zorki litaratury.
Prychodźcie siemjami i ź siabrami. Pačatak a 18.00. Uvachod volny.
Dajezd da kanhres-choła «Viktoryja» aŭtobusami 1, 69 albo maršrutkami 1056, 1112 (prypynak «Kamsamolskaje voziera»).
