Kiraŭnik Ministerstva zamiežnych spraŭ Uładzimir Makiej zajaviŭ, što Biełaruś hatovaja adpravić svaich vajskoŭcaŭ-miratvorcaŭ na Danbas, kali heta padtrymajuć usie zacikaŭlenyja baki.
Ale chto ž takija biełaruskija miratvorcy?
«Miratvorčy kantynhient rychtujuć u biełaruskim vojsku z 2000-ch. Heta tolki kantraktniki. Sałdaty terminovaj słužby ani ŭ jakim vypadku nie mohuć udzielničać u padobnych misijach», — patłumačyŭ «Našaj Nivie» pres-sakratar Minabarony Uładzimir Makaraŭ.
Dakładnaja kolkaść vajskoŭcaŭ-miratvorcaŭ nieviadomaja. Ale asobnaja miratvorčaja rota isnuje ŭ 103-j asobnaj hvardziejskaj pavietrana-desantnaj bryhadzie, jakaja mieścicca ŭ Viciebsku. Jana była stvorana ŭ 2005 hodzie. Ahułam miratvorcaŭ kala 250 čałaviek.
Kala 40-50 čałaviek — heta upraŭleńnie i dva ŭzvody, navučalny i miratvorčy. U składzie kožnaha ŭzvoda majucca štatnyja instruktary. Plus kala 200 čałaviek u pieramiennym składzie — heta vajskoŭcy-kandydaty ŭ padraździaleńni miratvorcaŭ. Jany ŭžo prajšli adpaviednuju padrychtoŭku, ale słužać u roznych čaściach pa ŭsioj krainie i čas ad času ŭdzielničajuć u adpaviednych zborach.
Kab trapić u miratvorčuju rotu, treba adpaviadać nastupnym kryteram: mieć vysłuhu nie mienš za try hady, svabodna vałodać zamiežnaj movaj, u tym liku čytać i pisać, pa stanie zdaroŭja pasavać dla słužby ŭ siłach śpiecyjalnych apieracyj, viedać tapahrafiju i ŭmieć akazvać pieršuju miedycynskuju dapamohu. Plus — prajści adpaviednyja psichałahičnyja testy.
Praŭda, sami vajskoŭcy pryznajucca: kandydataŭ adbiraje niepasredna kamandzir roty, kali jon paličyć pretendenta vartym, to voźmie, a prablemy, naprykład, z zamiežnaj movaj možna vyrašyć i paźniej. Paśla vajskoviec prachodzić kursy ŭ Vajskovaj akademii.
Paśla zaličeńnia miratvorcy vyvučajuć nie tolki ahniavuju i taktyčnuju padrychtoŭku, ale i mižnarodnaje humanitarnaje prava, dadatkovyja zamiežnyja movy. A z 2007 hoda jašče i abaviazkova vučacca skakać z parašutam. Pierad pracaj u miratvorčaj misii vajskoŭcy abaviazkova vyvučajuć krainu, u jakuju nakiroŭvajucca, miascovyja zvyčki i asablivaści. Pry hetym pierad niepasrednaj adpraŭkaj na misiju, miratvorcy pišuć zajavy na imia Alaksandra Łukašenki, jakija padpisvaje asabista jon.
Akramia miratvorčaj roty, ad Biełarusi ŭ ramkach płanavańnia i acenki sił prahramy NATA «Partniorstva dziela miru» raniej byŭ taksama zajaŭleny patrulny ŭzvod (ad vajennych kamiendatur Uzbrojenych Sił); vajenna-transpartny samalot Ił-76 MD z dvuma ekipažami lotnaha składu i dźviuma hrupami naziemnych śpiecyjalistaŭ pa absłuhoŭvańni pavietranaha sudna (ad 50-j źmiašanaj avijacyjnaj bazy Vajenna-pavietranych siłaŭ i vojskaŭ supraćpavietranaj abarony); aficery Uzbrojenych Sił dla pracy ŭ składzie šmatnacyjanalnych štaboŭ (da 15 čałaviek); hrupa śpiecyjalistaŭ-miedykaŭ (da 7 čałaviek); mabilny špital.
Taksama isnujuć i miratvorcy, jakija rychtujucca ŭ miežach supracoŭnictva ADKB. Pa słovach analityka Alaksandra Alesina, heta dźvie bryhady — sił śpiecyjalnych apieracyj i bryhada śpiecnaza MUS. Jany słužać u Biełarusi, ale ž pieryjadyčna prachodziać adpaviednuju padrychtoŭku na vučeńniach.
Sioleta ŭ lipieni kamandujučy siłami specyjalnych aperacyj uzbrojenych sił Biełarusi Vadzim Dzienisienka raspaviadaŭ, što adzin uzvod užo całkam hatovy ŭdzielničać u miratvorčych apieracyjach pad ehidaj AAN.
«Ciaham hetaha hodu ŭ nas vielmi surjozna adpracavali delehacyi ź Italii, Vielikabrytanii, dźvie delehacyi z Polščy. Svajo testavańnie chutka buduć pravodzić instruktary z ZŠA. My vyjšli na narmalny ŭzrovień u padrychtoŭcy miratvorčaj roty», — kazaŭ Dzienisienka.
Akramia padrychtoŭki ŭ Biełarusi, našy miratvorcy rehularna prymajuć udzieł u adpaviednych mižnarodnych vučeńniach. Apošnija ź ich — ad ADKB — prajšli zusim niadaŭna, u kancy kastryčnika ŭ Kazachstanie, tam adpracoŭvali dziejańni va ŭmovach masavaha prybyćcia biežancaŭ.
Što tyčycca praktyki, to biełaruskija miedyki prymali ŭdzieł u miratvorčaj misii ŭ Livanie ŭ 2010 hodzie. Kantynhient byŭ niešmatliki — aficer i čaćviora miedykaŭ. Chirurh, aniestezijołah, apieracyjnaja siastra i siastra-anestezist pracavali ŭ vajennym špitali Časovych sił AAN u Livanie, aficer štaba adkazvaŭ za ŭzajemadziejańnie kamandavańnia misii ź miascovymi siłavikami. Akramia Livana, biełaruski ekśpiert nakiroŭvaŭsia ŭ Paŭdniovy Sudan.
Prapanovy Łukašenki pra nakiroŭvańnie biełaruskich miratvorcaŭ na Danbas išli z 2015 hoda. Ale jakaja imaviernaść taho, što biełarusy ŭsio ž pajeduć tudy paśla zajavy Makieja?
U Minabarony pakul nie zmahli prakamientavać hetaje pytańnie. Alaksandr Alesin miarkuje, što pakul adpraŭka biełarusaŭ małavierahodnaja.
«Łukašenka prapanoŭvaŭ nieadnarazova. Ale tady inicyjatyva nie znajšła padtrymki ani va Ukrainie, ani ŭ Rasii. Jany dumali, što raźbiarucca svaimi siłami. Ale siońnia kanflikt zajšoŭ u tupik, vajennaha rašeńnia jaho nie bačna. I ciapier pa prapanovie Pucina vyrašyli abapiracca na miratvorcaŭ. Adnak nie vyznačanaje hałoŭnaje pytańnie — dzie miratvorcy buduć raźmiaščacca? — kaža Alesin. — Bo na dumku Pucina, miratvorcy musiać raźmiažoŭvać ukrainskija vojski i vojski samaabvieščanych respublik. Na dumku Ukrainy, miratvorcy pavinny znachodzicca na miažy z Rasijaj, kab adtul nie pastupała zbroja i nie jechali tak zvanyja «dobraachvotniki».
Alesin padkreśliŭ, što varyjant Pucina pryviadzie da taho, što situacyja na Danbasie pieratvorycca ŭ zamarožany kanflikt, anałahičny situacyi ŭ Prydniastroŭi.
«To bok Ukraina faktyčna pahodzicca, što častka terytoryi adabranaja na niavyznačany čas, a moža, i nazaŭsiody, — padkreśliŭ analityk. — Kali ž miratvorcy buduć znachodzicca na miažy z Rasijaj, to nie budzie dapamohi adtul, i u budučyni «DNR» i «ŁNR» mohuć nie dać rady ŭkrainskim vojskam. To bok, Ukraina tearetyčna zmoža viarnuć terytoryi. I hety varyjant nie vielmi padabajecca Pucinu i kiraŭnikam niepryznanych respublik. Tamu navat kali aficyjna pahodziacca na ŭdzieł miratvorcaŭ, to nieaficyjna mohuć im pieraškodzić. U «DNR» i «ŁNR» chopić mocy nie puścić miratvorcaŭ na miažu z Rasijaj.
Tamu pakul niama pahadnieńnia bakoŭ, varyjant adpraŭki našych miratvorcaŭ bačycca mnie małaimaviernym».
Pryčym, adznačaje Alesin, udzieł biełaruskich miratvorcaŭ va ŭrehulavańni kanfliktu na Danbasie budzie karysny ŭ pieršuju čarhu dla samoj Biełarusi.
«My i tak abjavili siabie miratvorcami, kali pradastaŭlali placoŭki dla pieramovaŭ. A ciapier, kali Rada biaśpieki dazvolić udzieł biełarusaŭ va ŭrehulavańni kanfliktu, to, značycca, suśvietnaja supolnaść aficyjna pryznała Biełaruś miratvorcam. A heta pavyšaje aŭtarytet našaj krainy», — adznačyŭ Alaksandr Alesin.
