Słuckim rajonnym adździełam Śledčaha kamiteta zavieršana rasśledavańnie kryminalnaj spravy ab razbojnym napadzie.
Abvinavačanymi pa kryminalnaj spravie pryznanyja dva 19-hadovyja žychary Mahiloŭskaj vobłaści. U červieni jany vyrašyli «zarabić» na davierlivaści žychara Słucka.
Abodva maładyja čałavieki nidzie nie pracavali. Adzin ź ich u internecie paznajomiŭsia z mužčynam i prapanavaŭ jamu kupić ałkahol. Padčas telefonnych razmoŭ damovilisia, što pradaviec pryviazie pakupniku ŭ Słuck 30 skryniaŭ harełki pa 20 butelek u kožnaj.
Dla realizacyi zadumy chłopcy navat arandavali mikraaŭtobus u Minsku, a ŭ jakaści kiroŭcy pryciahnuli treciaha znajomaha (pra dalejšy namier parački toj nie viedaŭ).
Na padjeździe da Słucka mikraaŭtobus złamaŭsia, i paciarpieły, kab zabrać tavar, padjechaŭ da maładych ludziej sa svaim znajomym. Padčas sustrečy padazravanyja zavabili pakupnika ŭ furhon pad padstavaj demanstracyi pradukcyi i, pahražajučy pnieŭmatyčnym pistaletam, zabrali ŭ jaho 230 rubloŭ.
Praŭda, nieŭzabavie chłopcaŭ zatrymali.
U chodzie śledstva abvinavačanyja davali supiarečlivyja pakazańni. Naprykład, śćviardžali, što parušyli zakon, kab źniać videaprank. U dalejšym jany nibyta mieli namier viarnuć hrošy paciarpiełamu i paprasić prabačeńnia, kali skončać zdymku.
«Praviedzienymi pieratrusami, vočnymi staŭkami, vynikami ekśpiertyz nakont kanfiskavanych pradmietach, u liku jakich zbroja, nož, mabilnyja srodki suviazi, i inšymi sabranymi dokazami ich dovady śledstvam byli abvierhnutyja», — paviedamlaje SK.
Ciapier «prankieraŭ»-niaŭdačnikaŭ čakaje sud. Im pahražaje da 15 hadoŭ pazbaŭleńnia voli.
