U Starym zamku ŭ Hrodnie archieołahi znajšli załaty piarścionak, paviedamlajecca na sajcie Hrodzienskaha dziaržaŭnaha historyka-archieałahičnaha muzieja.
Tut i nižej fota: museum-grodno.by
Archieołahi vyvučajuć dvor Staroha zamka pierad pačatkam rabot pa rekanstrukcyi histaryčnaha abjekta. Druhi tydzień raskopak prynios unikalnyja znachodki. Za dzień da hetaha była znojdzienaja šachmatnaja fihura, prykładna XIV stahodździa. Najbolš imavierna, heta ładździa. 25 kastryčnika archieołahi znajšli žanočy załaty piarścionak. U papiaredni raz załaty piarścionak (mužčynski) byŭ znojdzieny na raskopkach u zamku ŭ 1949 hodzie.
Vyjavili znachodki ŭ płaście, jaki adnosicca da kanca XIV — pačatku XV stahodździa. Siarod inšych pradmietaŭ — kavanaja spražka ad remienia, tačylny asiałok, ćviki, častki mietaličnych vyrabaŭ, jakija taksama adnosiacca da toj epochi. Raniej, naprykład, byli znojdzienyja častki budaŭničych materyjałaŭ, kieramika i manieta XVII stahodździa. Archieołahi vyjšli da kamiennaha bruku, pad jakim užo draŭlanaja zabudova zamka. Jak adznačajuć śpiecyjalisty, raskopki dazvolać daviedacca pra płaniroŭku zamka ŭ roznyja hady jaho isnavańnia.
