Kolkaść dziaciej i padletkaŭ, jakija pakutujuć na atłuścieńnie, za apošnija 40 hadoŭ vyrasła ŭ 10 razoŭ. Da takoj vysnovy pryjšli aŭtary novaha daśledavańnia, praviedzienaha łondanskim Impierskim kaledžam sumiesna z Suśvietnaj arhanizacyjaj achovy zdaroŭja (SAAZ). Jany praanalizavali pakazčyki masy cieła i rostu amal 130 miljonaŭ čałaviek, starejšych za piać hadoŭ, paviedamlaje Centr navin AAN.
Ekśpierty śćviardžajuć, što kali isnujučaja tendencyja nie źmienicca, to kolkaść dziaciej i padletkaŭ z zališniaj vahoj i atłuścieńniem da 2022 hoda pieravysić kolkaść dziaciej z deficytam masy cieła.
Pryčyny takoj tryvožnaj situacyi — raznastajnyja. Hałoŭnaja, na dumku doktara Fijony Buł, u tym, što naš śviet imkliva źmianiajecca.
«Za apošnija 40 hadoŭ adbylisia kardynalnyja źmieny ŭ tym, što tyčycca praduktaŭ charčavańnia, porcyj, pavodzin, spažyvańnia. Usio bolš dastupnyja pradukty, jakija prajšli techničnuju apracoŭku. Jany šyroka rekłamujucca i ceny na ich značna nižejšyja. I miarkujučy pa tym, što prablema atłuścieńnia isnuje ŭ bolšaści rehijonaŭ, my ŭsie spažyvajem takija pradukty», — skazała Fijona Buł.
Pakazčyki atłuścieńnia ŭ darosłych taksama vyraśli: sa 100 młn u 1975 hodzie da 671 młn u 2016 hodzie. Bolš za ŭsio ludziej, jakija pakutujuć ad zališniaj vahi, žyvie ŭ Paliniezii i Mikranezii. Za imi idzie hrupa anhłamoŭnych raźvitych krain, śpis jakich uznačalvajuć ZŠA. U Jeŭrapiejskim rehijonie atłuścieńnie adznačanaje ŭ 23% žančyn i 20% mužčyn. Što tyčycca dziciačaha atłuścieńnia, to samyja vysokija pakazčyki zafiksavanyja na Malcie i ŭ Hrecyi, a samyja nizkija — u Małdovie.
Zališniaja vaha pryvodzić da sardečna-sasudzistych zachvorvańniaŭ, dyjabietu i inšych prablem sa zdaroŭjem. Jana čaściakom źjaŭlajecca pryčynaj styhmy i ździekaŭ, ad jakich asabliva pakutujuć dzieci.
U SAAZ zaklikajuć, pierš za ŭsio, staranna daśledavać pryčyny takoha rezkaha rostu maštabaŭ atłuścieńnia, i raspracavać miery, jakija dapamahli b spynić hetuju tendencyju.
