4 kastryčnika prapucinskija bajkiery «Načnyja vaŭki» apublikavali na svajoj staroncy Vkontaktie infarmacyju pra hibiel 19 vieraśnia siabra ichniaha kłubu z Homla 42-hadovaha Alaksieja Jaraševiča. Paźniej «Naša Niva» sa spasyłkaj na telehram-kanał paviedamiła: Jaraševič, imavierna, zahinuŭ u Siryi.
Za try dni da śmierci
Karespandentka belsat.eu praz sacyjalnyja sietki znajšła znajomaha Jaraševiča, taksama biełarusa Dźmitryja Niaściuka. Vyśvietliłasia, što za try dni da śmierci Alaksieja jany sustrakalisia ŭ Padmaskoŭi.
«16 vieraśnia byŭ u siabra na dni narodzinaŭ. Paznajomilisia ź Lošam, pahutaryli, pili viski. Spakojny, upeŭnieny ŭ sabie… I voś 19-ha jaho ŭžo nie stała. Ad chłopcaŭ (z kłubu «Načnyja vaŭki») daviedaŭsia — jon zahinuŭ u Siryi», — raspavioŭ Niaściuk.
Jon dadaŭ, što Jaraševič, miarkujučy pa našyŭkach na bajkierskaj vopratcy, mieŭ davoli vysokaje zvańnie ŭ «Načnych vaŭkach».
«Chłopcy pajechali na pachavańnie. Chavać buduć na radzimie, u Homli. Tudy šmat našych pajechała i jany zastanucca ŭ Biełarusi ciaham bližejšych dzion».
Jašče adzin siabar Jaraševiča, taksama «načny voŭk» z padmaskoŭnaha Krasnahorska Alaksiej Kaposaŭ, skazaŭ pa telefonie, što ciapier znachodzicca ŭ Homli.
«Tak, Alaksiej sapraŭdy zahinuŭ u Siryi. Cieła jašče nie dastavili. Dakładnaha času pachavańnia nie viedaju, ale nie dumaju, što žurnalistam varta tam prysutničać. Samaja vialikaja prablema ciapier — heta toje, što biełaruskija słužby admaŭlajucca pryznavać paśviedčańnie ab śmierci, vydadzienaje ŭ Siryi».
Kryminalnyja razborki i krymski śled
Jaraševič naradziŭsia ŭ Homieli, u bajkierskim kłubie — z kanca 2000-ch. Naležaŭ da homielskich «Načnych vaŭkoŭ», ale časova byŭ «prypisany» da filii ŭ rasijskim horadzie Daŭhaprudnym. Imavierna, apošnim časam žyŭ u Rasii. U 2012-m prachodziŭ jak paciarpieły pa spravie ab stralaninie ŭ Zielenahradzie, kali adbyłasia sutyčka pamiž «Načnymi vaŭkami» i inšym kłubam. U vyniku adzin čałaviek zahinuŭ, a Jaraševič trapiŭ u reanimacyju. Paśla vystupaŭ jak śviedka na sudzie ŭ hetaj spravie.
Jaraševič (sprava) daje pakazańni ŭ sudzie ŭ spravie ab stralaninie ŭ Zielenahradzie
Pracavaŭ u pryvatnym achoŭnym pradpryjemstvie «Voŭk», padkantrolnym bajkieru Załdastanavu. Pradpryjemstva maje razhalinavanuju strukturu. Ofisy jość u Maskvie, Varoniežy, Kazani, Surhucie, a paśla anieksii Krymu — i ŭ Bachčysarai.
Alaksiej Jaraševič fihuruje ŭ rasśledavańni «Novaj haziety», apublikavanym 2 lipienia 2014 hoda. Materyjał tyčyŭsia rasiejcaŭ, jakija pa viartańni z Kryma atrymali miedali i padziaki ad Pucina: chto za bai, chto za prapahandysckuju pracu na miescy. U sakretnym śpisie ŭznaharodžanych, što patrapiŭ da žurnalistaŭ, Alaksiej Jaraševič značycca pad numaram 160.
Pry takim bekhraŭndzie jość padstavy ličyć: spryčyniŭsia Jaraševič i da kanfliktu na Danbasie. Jahony siabar Kaposaŭ hetaha nie admaŭlaje, ale i nie choča adkryta paćviardžać, spasyłajučysia na toje, što jany «redka bačylisia».
Niebiaśpiečnaja kampanija
Na pytańnie, jakim čynam hamielčuk patrapiŭ u Siryju, Kaposaŭ adkazaŭ: «Jon tam pracavaŭ u budaŭničaj kampanii».
Ale što moh budavać biełarus u amal całkam zrujnavanaj vajnoj krainie? U tych ža sacyjalnych sietkach u vočy kidajecca ŭspamin adnaho z tavaryšaŭ zahinułaha. Na fota profila Arman Žanajdaraŭ paziruje u formie z rasijskim trykałoram.
«…Jon nie raz prykryvaŭ śpinu bratam. Žartavali: «Locha, u ciabie 9 žyćciaŭ». Jon syšoŭ jak vajar, u bai», — piša Žanajdaraŭ.
Ci była kamandziroŭka ŭ Siryju pieršaj i apošniaj dla Jaraševiča, pakul nieviadoma. Ale pad «budaŭničaj kampanijaj», dzie toj nibyta pracavaŭ na momant hibieli, moža nasamreč chavacca «ČVK Vahniera» — hrupoŭka rasijskich najmitaŭ pad kamandvańniem aficera HRU, padpałkoŭnika zapasu Dźmitryja Utkina.
«Vahnieraŭcy» brali ŭdzieł u vajnie na Danbasie i šturmie Palmiry ŭ Siryi. Siaredni miesiačny akład bajca hetaj struktury — 250 tysiač rasijskich rubloŭ (bolš za 4000$). Kampaniju finansuje ŭpłyvovy biznesoviec ź blizkaha atačeńnia Pucina Jaŭhien Pryhožyn. Pierad adpraŭkaj na Danbas i ŭ Siryju najmitaŭ trenirujuć na bazie śpiecnazu pad Krasnadaram. Dakładnuju kolkaść zahinułych u Siryi Minabarony RF nie nazyvała ŭ tym liku tamu, što nie ŭličvała hetych «žaŭnieraŭ udačy».
Pastupova Kreml pačaŭ rabić zachady, kab lehalizavać svaich bajcoŭ za miažoj. U śniežni 2016 hoda Pucin padpisvaje zakon «Ab voinskaj pavinnaści i vajskovaj słužbie», jaki dazvalaje nakiroŭvać rasijskich vajskoŭcaŭ za miažu dla ŭdziełu ŭ miratvorčych i antyterarystyčnych apieracyjach na asnovie karotkaterminovaha kantraktu. A sioleta 8 kastryčnika Pucin padpisvaje ŭkaz, što nadaje takija ž mahčymaści zamiežnikam.
De-jure hramadzianie Biełarusi ciapier mohuć ustupać u šerahi vojska RF i vajavać u haračych kropkach — rasijski zakon, u adroźnieńnie ad biełaruskaha, jany takim čynam nie parušajuć.
Čamu bajcy «ČVK Vahniera» siońnia mohuć lehalna prysutničać u Siryi? U červieni hetaha hoda pieciarburhskaje vydańnie «Fontanka» daviedałasia: pamiž Ministerstvam nafty i pryrodnych resursaŭ Siryi i Minenierha RF była zaklučanaja damova, pavodle jakoj rasijskaje TAA «Jeŭrapolis» abaviazujecca vyzvalać ad praciŭnikaŭ Asada naftavyja i hazavyja radoviščy, adbudoŭvać ich i achoŭvać. Jak vyśvietlili žurnalisty telekanała RBK, «Jeŭrapolis» ščylna źviazany z Pryhožynym, a taksama z «ČVK Vahniera» i maje ŭ Siryi aficyjna zarehistravanaje pradstaŭnictva.
Mahčyma, mienavita praz takuju «budaŭničuju kampaniju» biełarus Alaksiej Jaraševič trapiŭ na siryjskuju vajnu.
***
Belsat.eu pasprabavaŭ źviazacca sa svajakami Alaksieja — jany žyvuć u Homli. Adnak tyja pakul nie hatovyja kantaktavać z presaj.
