U ZŠA źjaviłasia niekamiercyjnaja niaŭradavaja arhanizacyja «Kamitet u padtrymku rasśledavańnia Rasiei» (Committee to Investigate Russia, CIR).
Videarolik sa zvarotam ad imia arhanizacyi zapisaŭ amierykanski akcior i režysior, uładalnik «Oskara» Morhan Frymen.
«Na nas napali. My viadziom vajnu», — kaža Frymen na pieršych siekundach videazapisu, apublikavanaha na sajcie i ŭ Twitter arhanizacyi.
«Šmatlikija pakaleńni ludziej zmahalisia, abaraniajučy demakratyju. Zaraz naša čarha. Pahladzicie, jak Morhan Frymen tłumačyć rasijski scenar pa padryvie ZŠA», — havorycca ŭ podpisie da rolika.
«Ujavicie taki kinascenar: były ahient KDB, razzłavany tym, što jaho Radzima razvaliłasia, zadumvaje pomstu. Karystajučysia chaosam i błytaninaj, jon uźbirajecca pa karjernaj leśvicy ŭ postsavieckaj Rasii i stanovicca prezidentam. Jon uvodzić aŭtarytarny režym. A zatym źviartaje ŭvahu na svajho zaklataha voraha — Złučanyja Štaty. I jak sapraŭdny ahient KDB, jon vykarystoŭvaje kibierzbroju dla napadu na demakratyju pa ŭsim śviecie. Vykarystoŭvajučy sacyjalnyja miedyja dla raspaŭsiudžvańnia prapahandy i łžyvaj infarmacyi, jon sparadžaje ŭ ludziej u demakratyčnych hramadstvach niedavier da ich ŚMI, da ich palityčnych pracesaŭ i da ich susiedziaŭ. I jon vyjhraje», — kaža Frymen.
«Hety špijon — Uładzimir Pucin. I heta nie kinascenar», — praciahvaje akcior.
Dalej Fryman zaklikaŭ prezidenta ZŠA Donalda Trampa raspavieści amierykancam praŭdu, pryznać umiašańnie Rasii ŭ vybary 2016 hoda i, pa prykładzie papiarednich pakaleńniaŭ, abaranić demakratyju i praciahnuć baraćbu.