Na matč nacyjanalnych zbornych Biełarusi i Ŭkrainy ŭ Lvoŭ pryjechała kala tysiačy biełaruskich zaŭziataraŭ. Jechali ciahnikami, mašynami, aŭtobusami. Kali va Ŭkrainu nia jechać, to dzie ž jašče padtrymać zbornuju krainy padčas haściavych matčaŭ? A tut jašče start adboračnaha cykłu da čempijanatu śvietu. Nadziei jašče žyvyja, chočacca vieryć u śvietłaje. Sama toje.
Uvohule, pabačyć biełaruskaha zaŭziatara ŭ centry Lvovu subotnim viečaram było spravaj lohkaj i prostaj. Jany byli paŭsiul, sa ściahami roznych uzoraŭ, u majkach Alaksandra Hleba i FK «Smarhoń». Śpiavali «Kasiŭ Jaś kaniušynu…» na praspekcie Šaŭčenki i pili piva na płoščy Rynak. Tam ža možna było pabačyć i hałoŭnaha redaktara «Priessbołu» Ŭładzimiera Bieražkova, ale biaź piva.
Dziela spraviadlivaści varta adznačyć, što nia ŭsie našy suajčyńniki viali siabie miralubna. Častka fanataŭ, kažuć, što mienskaha «Dynama», učyniła bojku z ukraincami. Mnohija ź ich potym pryjšli na trybuny ź finhałami i pieraviazanymi hałovami, ale ščaślivyja ad uśviedamleńnia taho, što plan-minimum vykanany.
Na trybunach bolšaść ź ich adrazu skinuła sakołki, kab prademanstravać svaje «bajavyja rany» — šmatlikija siniaki i rany. Zrešty, hetym fruktam, napeŭna, futboł byŭ druhasny ŭ paraŭnańni z mahčymaściu ź niekim pabicca.
Dobra, što chapała i advarotnych prykładaŭ. Skazaŭ by navat, što jany značna pieravyšali. Biełarusam addali całkam 2-i sektar stadyjonu «Ŭkraina», ale navat hetaha było mała. Adzinkavyja bieł‑čyrvona‑biełyja ściahi byli taksama ŭ inšych sektarach. Časam zdavałasia, što nievialičkaja kupka biełarusaŭ pierakrykvaje ceły stadyjon haspadaroŭ.
Dobra heta było zaŭvažna pa tajmie pieršym, kali kamanda Bernda Štanhie amal nie vypuskała ŭkraincaŭ ź ich pałovy pola. Zdajecca, što sami haspadary nie čakali takoha sprytu ad biełarusaŭ.
Asabliva ž ad fanataŭ našaj kamandy dastavałasia Arciomu Mileŭskamu, jaki koliś źmianiŭ hramadzianstva ź biearuskaha na ŭkrainskaje. Pry kožnym jahonym kantakcie ź miačom, zaŭziatary pačynali abśvistvać forvarda, a to jašče horaj hukali: «A Mileŭski — prastytutka!» ci «Mileŭski — pios». Pa ŭsim bačna, što chłopiec dobra čuŭ hetyja słovy. Kali jaho zamianili, to jon u rospačy razmachnuŭsia nahoj pa pavietry. U Miensku ž Mileŭskamu budzie jašče ciažej psychalahična. Fanaty jamu tak i nie daravali.
Bieł‑čyrvona‑biełych ściahoŭ na biełaruskim sektary było zaŭvažna bolej, čym čyrvona‑zialonych. Cikava, što było b u Miensku, kab dazvolili pranosić lubuju atrybutyku? Badaj, niešta padobnaje.Namieśnik redaktara hazety «Tovariŝ» Dźmitry Janienka byŭ z savieckim ściaham. Zrešty, kačać niejki razborki na padstavie taho, što ŭ niekaha nie takaja koleravaja hama na štandarach, nichto i nia dumaŭ. Usie ž baleli za Biełaruś.
Asobnaj zhadki vartyja chłopcy z B‑12. Jany i byli hałoŭnym akumulataram usich padziejaŭ na trybunie. Kab milicyjanty dazvolili ściahi na dreŭcach, to amal kožny mieŭ byŭ u rukach bieł‑čyrvona-biełaje pałotnišča. Byli dva barabany, jakija značna dapamahali skandavać.
Uraziła, jak padčas pierapynku sektar družna śpiavaŭ «Troch čarapach» i «Pavietrany šar». Pryčym, skłałasia takoje ŭražańnie, što słovy viedali kožnyja dva čałavieki z troch. Tak naturalna heta hladziełasia. Kažuć, što raniej pieli «Kaciušu» ci «Čornaha vorana».
Cikava, što napačatku matču sektar hukaŭ «Biełaruś vsiehda budiet piervoj», to ŭžo ŭ druhoj pałovie «Biełaruś zaŭždy budzie pieršaj». A jašče było «Vierym! Možam! Pieramožam!». Užo nie kažu pra «Žyvie Biełaruś». Časam składvałasia ŭražańnie, što ty nie futbole, a na niejkim nacyjanalnym mitynhu.
Kali na piataj dadanaj chvilinie adbyłasia trahiedyja z penalci, to cišynia na našaj trybunie doŭžyłasia tolki niekalki sekundaŭ. Paśla stała čutna hučnaje «Biełaruś».
Kamanda sychodziła z pola pad hladackija avacyi. Nichto z zaŭziataraŭ ni na chvilinu nie rasčaravaŭsia ŭ zbornaj. Pryjemna, što Hleb i kampanija taksama adznačyli heta. Jany ciopła padziakavali trybunam za padtrymku.
Štanhie jašče nia vyčarpaŭ limit ziaŭziatarskaha davieru. U vypadku pieramohi nad Andoraj, niama sumnievaŭ, što stadyjon «Dynama» padčas hulni z Anhlija budzie zabity.
U materyjale vykarastyny zdymki z sajtu ultras.org.ua
