Padčas śviatkavańnia Dnia biełaruskaha piśmienstva ŭ Barysavie byli padviedzienyja vyniki nacyjanalnaha konkursu «Mastactva knihi—2008».
«Załaty falijant» pieramožcy ŭ naminacyi «Najlepšy fotaalbom» atrymała kniha Dzianisa Ramaniuka «Moj šlach Biełaruś». A za fatazdymki da hetaha albomu, a taksama albomu «Čarnobyl», jon byŭ uhanaravany ŭ naminacyi «Najlepšy fotamastak».
Dzianis Ramaniuk bolš za dziesiać hadoŭ raspracoŭvaje temu biełaruskaha krajavidu. Pabyvaŭšy z fotaaparatam amal va ŭsich kutkach Biełarusi, fotamastak adźniaŭ sotni stužak, jakija zachoŭvajuć čaroŭnyja i biaskonca pryhožyja vyjavy pryrody. Biełaruskija krajavidy, zafiksavanyja ŭ roznyja pory hoda i sutak, razam ź śvitankami i zachodami, tumanami i navalnicami splatajucca ŭ čaroŭnuju nizku mastackich tvoraŭ.
U fotaalbom «Moj šlach — Biełaruś» Ramaniuk ukłaŭ najlepšyja tvory z hetaj seryi. Usiaho na staronkach albomu 86 fatazdymkaŭ. Hledačy pabačać nia tolki viadomyja hieahrafičnyja miescy i pomniki architektury — jany atrymajuć mahčymaść zazirnuć u schavanyja ad asnoŭnych daroh i turystyčnych maršrutaŭ kutki Biełarusi, jakija zachavali «niekranutuju pryhažość».
Dzianis — aŭtar NN ad 1991 hodu. Niekatoryja z fotaŭ, što ŭvajšli ŭ knihu, publikavalisia na staronkach vydańnia.
