Adzin z samych papularnych rep-vykanaŭcaŭ Biełarusi Vožyk (Dźmitryj Zajko) vyrašyŭ pasprabavać svaje siły ŭ nacyjanalnym adbory na Jeŭrabačańnie. Dla hetaha jon zapisaŭ razam z maładoj vykanaŭcaj Janaj Prusakovaj pieśniu «Zabi, Boža».
«Hadoŭ šeść tamu ŭ mianie źjaviłasia ideja paŭdzielničać u Jeŭrabačańni. Na toj momant ja paličyŭ, što rep — heta nie toj styl, ź jakim možna jechać pa pieramohu. Tamu najlepšym varyjantam mnie padaŭsia fołk-chip-chop. Dumałasia zrabić nievierahodny trek z Shuma, z Rusiaj, ale nie atrymałasia, — raskazvaje Vožyk. — I tak ja žyŭ-žyŭ. Pačynaju abličboŭvać sieńnienski archiŭ doma kultury. I tut hladžu — pieśnia! Na žoŭcieńkim arkušyku papiery zapisanaja. Jarkaja, emacyjnaja, krutaja i adnačasova žorstkaja. Nikoli nie bačyŭ, kab niechta padobnaje rabiŭ».
Apošni hod Vožyk pracuje mietadystam pa falkłory ŭ rajonnym centry Sianno Viciebskaj vobłaści, adtul repier sam rodam. Pieśnia hetaja zapisanaja ŭ 1997 hodzie ŭ vioscy Ramanoŭka Sieńnienskaha rajona ŭ Prystaŭki Nadziei Haŭryłaŭny 1921 hoda naradžeńnia. Papierka z zapisam pa-raniejšamu lažyć u Vožyka na pracy.
«Ja navat prapanoŭvaŭ hetuju pieśniu roznym hurtam, bo zabyŭsia ŭžo, što folk-rep — heta kruta. I heta było da toj pary, pakul mianie nie zaprasili na folkavy fiestyval u Polšču. A ŭ mianie nie było nijakich interpretacyj falkłoru! U vyniku ja damoviŭsia ź Dzimam Deech-am. Heta adzin z samych topavych našych elektronnych dy-džejaŭ i moj najlepšy siabra. Z kim jon tolki ni pracavaŭ: i z LSP, i z Shuma, i ŭ Paryžy vychodziŭ. I jon mnie robić instrumientał.
Dla taho, kab zrabić demku, ja pačaŭ šukać dziaŭčynu ŭ paru. Ja zaŭvažyŭ, što ŭ nas u Sianno vielmi krutaja vykładčyca ŭ muzykałcy, śpiavaje kłasna, trymajecca na scenie. Padumaŭ, daj ź joj demku zrablu, a potym užo jak pakacić. I što vy dumajecie? Zapisali, ja skinuŭ Deech-u, i my vyrašyli, što nam nichto nie treba, my pakidajem jaje».
Jana Prusakova — tak zavuć druhuju vykanaŭcu — paśla muzyčnaha kaledža pracavała pa raźmierkavańni ŭ cieńnienskaj muzyčnaj škole, joj 20 hadoŭ. Ciapier jana pastupiła ŭ mahiloŭskuju kansiervatoryju.
«Ja pierakanany, što heta naša nie apošniaja sumiesnaja praca ź Jankaj, u jaje vielizarny patencyjał, kali joj nie pieraškodzić biełaruskaja ścipłaść, jakaja nie zaŭsiody idzie na karyść. Ale mienavita hetaja jakaść robić pracu ź Janaj prostaj i pryjemnaj. U vyniku ŭ nas usio sieńnienskaje: sieńnienskaja pieśnia, sieńnienskaja śpiavačka, sieńnienski bit-mejkier», — śmiajecca repier.
«I kali Deech zrabiŭ uvieś instrumientał, to ja padumaŭ: jakaja Polšča, pajedziem lepš na Jeŭrabačańnie! Na minułym Jeŭrabačańni ŭsim spadabałasia pieśnia pa-biełarusku, nikomu za jaje nie było ni soramna, ni ahidna. A jašče i vyjhrała pieśnia na nacyjanalnaj movie — partuhalskaj. Ciapier taki trend: viartańnie da karanioŭ», — kaža Vožyk.
Samu aryhinalnuju pieśniu vykanała Jana Prusakova, a Vožyk napisaŭ ułasny aŭtarski ŭstup.
«Pieśnia afihiennaja sama pa sabie, ale jana ŭžo isnuje jak asobny tvor, navošta mnie prosta vydavać jašče raz. Ja vyrašyŭ jaje zrabić bolš sučasnaj, tamu zapisaŭ takuju padvodku. Maja zadača była być niezaŭvažnym refiery, nie vypiačvać siabie, nie być na pieršym miescy, ale kab sa mnoj jana była kruciejšaj, čym bieź mianie. Heta takaja razynka».
Ci vieryć Vožyk u pierśpiektyvy rep-pieśni na Jeŭrabačańni? Zdajecca, heta nie zusim patrebny farmat dla papsovaha konkursa.
«Na minułym Jeŭrabačańni narviežcy vykonvali amal rep i zaniali vysokaje miesca. Lordi taksama vyjhrali, a jany niefarmat. Zaŭsiody vyjhraje toj, chto adroźnivajecca, tamu etna-rep tut vyhadna vyhladaje».
Pra što ž zapisanaja kampazicyja? «Heta pieśnia pra adzinotu, nieparazumieńnie i biezvychodnaść. Daminantnaja dla mianie tut tema biezvychodnaści, niemahčymaści dla asoby pałamać hramadskija ŭstoi. Za asnovu ŭziataja žniŭnaja pieśnia narodnaja. Dziaŭčynu addali za nialubaha, jak čaściakom byvała. Takija pieśni raniej vykonvali funkcyju vykidu emocyj. Dziaŭčaty śpiavali takuju pieśniu, i ich niehatyŭ i złoba žyli ŭ śpievach padčas vykanańnia. A potym jany viartalisia ŭ siemji dy praciahvali vykonvać svaje abaviazki. Vychadu nie było ž. Voś usia hetaja pieśnia — sproba asensavać emocyi i dumki hetaj dziaŭčyny-žniejki, jakaja nie moža źmianić ničoha ŭ svaim stanie», — raskazvaje jaje stvaralnik.
Na sajcie NN.by pradstaŭlena poŭnaja viersija kampazicyi «Zabi, Boža». Dla Jeŭrabačańnia budzie zapisany adaptavany trochchvilinny trek. Jeŭrabačańnie-2018 projdzie ŭ mai nastupnaha hoda ŭ Lisabonie.
