Fest biełaruskaj bardaŭskaj pieśni «Aršanskaja bitva — 2008» prajšoŭ kala vioski Haćkaŭščyna pad Voršaj.
Pieršyja ŭdzielniki pačali źbiracca na Krapivienskim poli jašče ŭdzień 6 vieraśnia, niahledziačy na toje, što pačatak festu byŭ pryznačany na 20.00. Pakul hości stavili namioty, aršanskija aktyvisty majstravali scenu dla vystupoŭcaŭ.
Nad namiotavym letnikam ŭźvilisia bieł-čyrvon-biełyja ściahi. Adnak supracoŭniki Aršanskaha RUUS, spasłaŭšysia na zahad kiraŭnictva, zahadali źniać ściahi, u supraćlehłym vypadku pahražajučy masavymi zatrymańniami. Peŭny čas amatary śpievaŭ spračalisia z achoŭnikami pravaparadku, jakija vyklikali padmacavańnie: na poli źjaviŭsia načalnik Aršanskaha rajadździełu milicyi Leanid Michajłaŭ i štatny videaapieratar z kameraj, jaki źniaŭ usich prysutnych na poli. Spadar Michajłaŭ zahadaŭ kanfiskavać najaŭnyja ściahi, paabiacaŭšy vyrnuć ich haspadaram pa skančeńni festu.
Adzin ściah milicyjanty zabrali, ale samy vialiki — toj, što ŭpryhožvaŭ scenu, źniać nie navažylisia. Pad hetym bieł-čyrvon-biełym symbalem kancert bardaŭskaj pieśni raspačaŭ Źmicier Sidarovič.
Sidarovič byŭ adnym z udzielnikaŭ samaha pieršaha festu «Aršanskaja bitva», jaki adbyŭsia ŭ 1991 hodzie. Sioleta słuchačy atrymali ŭ padarunak admysłovuju brašuru, pryśviečanuju historyi aršanskaj bardaŭskaj imprezie.
Brašuru, układalnikam jakoj staŭ Juryj Kopcik, atrymali ŭsie achvotnyja.
Letaś fest ledźvie nia byŭ sarvany: napiaredadni milicyja raspaŭsiudziła infarmacyju, što na miescy, dzie zazvyčaj prachodzić fest, znajšli miny i snarady. Fest vyrašyli pieranieści ŭ inšaje miesca, ale milicyjanty, u aŭralnym paradku źviezienyja na Aršanščynu z troch bližejšych rajonaŭ, zahadvali ludziam ź placakami i hitarami razvaročvacca i kiravacca dadomu. Niekalki dziesiatkaŭ aktyvistaŭ byli zatrymanyja.
Vykazvalisia mierkavańni, što fest «Aršanskaja bitva» užo nie adnovicca paśla milicejskaha razhonu – što ludzi prosta bolš na jaho nie źbiarucca. Adnak ludzi pryjechali, chacia sioletni fest atrymaŭsia j nia samym masavym za ŭsiu jahonuju historyju: pasłuchać vystupoŭcaŭ i paśpiavać sabrałasia kala 150 čałaviek.
