8 vieraśnia kataliki abodvuch abradaŭ śviatkujuć Naradžeńnie Najśviaciejšaj Baharodzicy (va ŭschodniaj tradycyi) ci Naradžeńnie Najśviaciejšaj Panny Maryi (u zachodniaj tradycyi).
Tradycyjna, Carkva śviatkuje tolki dni śmierci śviatych - dni ichniaha naradžeńnia dla nieba. Vyklučeńnie składajuć dvoje najvialikšych śviatych u Carkvie: Usiačystaja Dzieva Maryja i śviaty Jan Chryściciel. Vierniki śviatkujuć nia tolki ich niabiesnaje, ale i ziamnoje rastvo.
Dla katalikoŭ bizantyjskaha abradu śviata Naradžeńnia Baharodzicy jość adnym z hałoŭnych, h.zv. «dvunadziasiatych» śviataŭ. Heta pieršaje hałoŭnaje śviata novaha liturhičnaha hodu, jaki pačaŭsia 1 vieraśnia.
Na chryścijanskim Uschodzie Rastvo Baharodzicy, jakoje pachodzić z vusnaj tradycyi Carkvy i apokryfaŭ, pačali śviatkavać nie paźniej za V stahodździe. Z Uschodu hetaje śviata pierajšło na Zachad, spačatku ŭ VII st. u Rym, a adsiul pašyryłasia na ŭsiu łacinskuju Carkvu. Ryma-katoliki, adnak, nie zaličvajuć hetaje śviata da liku «abaviazkovych», h.zn. tych, u jakija vierniki abaviazany ŭdzielničać u imšy.
