Niebyvała haračaje dla biełaruskaha vieraśnia nadvorje pryviało da padzieńnia 111-hadovaha tempieraturnaha rekorda hetaha miesiaca.
Jak paviedamili BiełaPAN u Respublikanskim hidramieteacentry, 7 vieraśnia ŭ Lelčycach (Homielskaja vobłaść) słupok termomietra ŭźniaŭsia da adznaki +33,5 hradusa. Raniejšy vieraśnioŭski rekord byŭ roŭny 32,9 hradusa (1897 hod, Kalinkavičy, Homielskaja vobłaść),raniejšy rekord dla 7 vieraśnia składaŭ 30,0 (1951 hod, Brest).
U niadzielu abnavilisia tempieraturnyja maksimumy dnia ŭ Minsku i čatyroch abłasnych centrach. U stalicy pavietra prahrełasia da 29,3 hradusa ciapła (raniejšy rekord — 27,7 hradusa ŭ 1951 hodzie), u Viciebsku — da 30,1 (26,9 u 1938 hodzie), u Mahilovie — da 30,2 (29,3 u 1954 hodzie), u Homieli — da 31,4 (29,6 u 1946 hodzie), u Breście — da 31,5 (30,0 u 1951 hodzie). U Hrodnie da paŭtareńnia rekorda (29,5 hradusa ŭ 1951 hodzie) nie chapiła 0,5 hradusa.
Napiaredadni, 6 vieraśnia, novyja absalutnyja maksimumy byli adznačany ŭ Breście — 30,6 (30,3 u 1954 hodu) i Homieli — taksama 30,6 (29,1 u 1954 hodzie). Ciaplej za ŭsio było ŭ Lelčycach (32,5). Heta novy rekord dnia dla ŭsioj krainy. Raniejšy taksama fiksavaŭsia ŭ hetym rajonnym centry (30,7 u 1984 hodzie).
U dzionnyja hadziny 8 vieraśnia pieravažna pa paŭdniova-ŭschodniaj pałovie Biełarusi tempieratura pavietra pavysicca da +30—32°S. U aŭtorak, 9 vieraśnia, na bolšaj častcy terytoryi pachaładaje da +14—20°S, na poŭdni — da +22°S.
