Pa zajavie baćki źnikłaha ŭ Homieli ŭkrainca Paŭła Hryba ŭ Biełarusi paśla praviadzieńnia pravierki budzie pryniata rašeńnie ab adkryćci kryminalnaj spravy. Pra heta siońnia na bryfinhu raspavioŭ pres-sakratar Ministerstva zamiežnych spraŭ Biełarusi Dźmitryj Mirončyk, piša Tut.by.
Pavieł Hryb
— Pieršasnaja pravierka, praviedzienaja pa zapycie ŭkrainskaj dypmisii ŭ Minsku pravaachoŭnymi orhanami Biełarusi, nie vyjaviła jakich-niebudź dadatkovych źviestak pa hetym pytańni. Razam z tym, uličvajučy hramadski rezanans va Ukrainie i zvarot pasolstva, hetaja tema znachodzicca na asablivym kantroli. Pavodle najaŭnaj na dadzieny momant infarmacyi, u biełaruskija kampietentnyja orhany ad baćki źnikłaha ŭkrainca Ihara Hryba 31 žniŭnia pastupiła adpaviednaja aficyjnaja zajava. Pa joj pravodziacca ŭsie nieabchodnyja pravieračnyja mierapryjemstvy, i ŭ vyniku ŭ praduhledžanyja zakonam terminy budzie pryniata rašeńnie ab adkryćci kryminalnaj spravy. Jakoj-niebudź dadatkovaj infarmacyi ad pravaachoŭnych orhanaŭ Ukrainy MZS Biełarusi nie atrymlivaŭ, — skazaŭ Mirončyk.
Hetaje ž pytańnie siońnia prakamientavaŭ žurnalistam namieśnik ministra zamiežnych spraŭ Aleh Kraŭčanka. Na pytańnie, jak adbivajecca na imidžy Biełarusi historyja sa źniknieńniem na našaj terytoryi Hryba, dypłamat adkazaŭ, što spadziajecca, što heta nie abvostryć adnosiny Biełarusi z Ukrainaj.
— Robicca ŭsio, što nieabchodna ŭ takoj situacyi, ale, na žal, hetaja situacyja razhladajecca ŭ takim bolš abvostranym rehijanalnym kantekście, — zajaviŭ namieśnik ministra.
Historyja źniknieńnia Paŭła Hryba
Nahadajem, ab źniknieńni 19-hadovaha ŭkrainca stała viadoma 28 žniŭnia. Pavieł Hryb pajechaŭ u Homiel na sustreču z rasijankaj, ź jakoj paznajomiŭsia ŭ internecie. Mierkavanaja dziaŭčyna Paŭła paviedamiła ŭ intervju «Jeŭraradyjo», što nie bačyła, kab u čas sustrečy maładoha čałavieka niechta zatrymlivaŭ. Adnak dadomu Pavieł nie viarnuŭsia, i jaho baćka Ihar Hryb pajechaŭ u Homiel, kab vyśvietlić miescaznachodžańnie syna. Tam jamu nieaficyjna paviedamili, što Pavieł znachodzicca ŭ vyšuku pa art. 205 KK RF (Terarystyčny akt) pa zapycie FSB Krasnadarskaha kraju.
Čarnihaŭskaja prakuratura 29 žniŭnia paviedamiła ab adkryćci kryminalnaj spravy pa fakcie źniknieńnia Paŭła Hryba. Mierkavanaja dziaŭčyna, ź jakoj źnikły Pavieł sustrakaŭsia ŭ Homieli, u intervju biełaruskim žurnalistam pryznałasia, što sustreča prajšła pa inicyjatyvie FSB.
28 žniŭnia pasolstva Ukrainy nakiravała notu ŭ MZS Biełarusi z prośbaj prainfarmavać ab hetaj situacyi. U MZS notu atrymali i, pa słovach pres-sakratara viedamstva Dźmitryja Mirončyka, ukrainski bok prainfarmujuć, jak tolki atrymajuć infarmacyju ad pamiežnych i pravaachoŭnych orhanaŭ Biełarusi. 30 žniŭnia ranicaj va ŭkrainskim pasolstvie adkazu z MZS Biełarusi jašče nie było.
Kiraŭnik MZS Ukrainy Pavieł Klimkin paviedamiŭ, što maje namier abmierkavać hetuju situacyju ź biełaruskim kaleham Uładzimiram Makiejem 31 žniŭnia. Paźniej u MZS Ukrainy zajavili, što z boku Biełarusi adsutničaje naležny ŭzrovień supracoŭnictva.
U MZS Biełarusi ŭ adkaz na heta ŭkazali Kijevu na niedarečnaść pahroz.
Z nahody zajavy ŭ Jeŭrapiejski sud reakcyja ad aficyjnaha Minska naŭrad ci źjavicca — na Biełaruś jurysdykcyja Jeŭrapiejskaha suda pa pravach čałavieka nie raspaŭsiudžvajecca, pakolki Biełaruś nie ŭvachodzić u Radu Jeŭropy.
Hryb-małodšy usie-taki zajechaŭ u Biełaruś
Taksama 31 žniŭnia ŭ Dziaržpamiežkamitecie Biełarusi paćvierdzili, što Pavieł Hryb pierasiakaŭ biełaruskuju miažu 24 žniŭnia.
«Hramadzianin Ukrainy Pavieł Hryb sapraŭdy pierasiok dziaržaŭnuju miažu Biełarusi 24 žniŭnia ŭ punkcie propusku «Novaja Huta» (Homielskaja vobłaść) va ŭstanoŭlenym zakanadaŭstvam paradku. Pretenzij z boku pamiežnaj słužby Biełarusi da hetaj asoby nie było», — raspavioŭ aficyjny pradstaŭnik DPK Anton Byčkoŭski.
Pavodle nieaficyjnaj infarmacyi šerahu biełaruskich i ŭkrainskich ŚMI, Pavieł Hryb moža znachodzicca ŭ SIZA Krasnadarskaha kraju Rasii. Tudy, pa słovach baćki źnikłaha chłopca, pavinny nakiravacca aficyjnyja pradstaŭniki MZS Ukrainy, hienieralnaha konsulstva ŭ Rastovie. Infarmacyi ad ich nie pastupała.
Na minułym tydni siamja źnikłaha ŭ Biełarusi ŭkrainca Paŭła Hryba źviarnułasia ŭ Jeŭrapiejski sud pa pravach čałavieka, zajaviŭšy, što Biełaruś, na terytoryi jakoj źnik ukrainiec, pavodle mižnarodnaha prava, niasie adkaznaść za hety vypadak.
