Ułady Azierbajdžana vykarystoŭvali padstaŭnyja kampanii ŭ Vialikabrytanii dla vypłat chabaraŭ jeŭrapiejskim palitykam, admyvańnia hrošaj i inšych karyślivych metaŭ. Płaciažy ŭ asnoŭnym pravodziŭ bank Danske praz estonski filijał. Takim čynam było admyta 2,9 młrd dalaraŭ, piša EUObserver.
Danske Bank, fota Jorge Láscar
Rasśledavańnie, jakoje pravodziłasia Centram pa daśledavańni karupcyi i arhanizavanaj złačynnaści (OCCRP) i viadučymi ŚMI Vialikabrytanii, Francyi, Hiermanii, Danii, Estonii i inšych krain, było apublikavanaje 4 vieraśnia.
U im havorycca, što firmy ŭ Vialikabrytanii, jakija ŭdzielničali ŭ admyvańni hrošaj, byli zarehistravanyja na padstaŭnych asob z Azierbajdžana i absłuhoŭvalisia ŭ estonskim filijale dackaha banka Danske Bank. Praź ich rachunki prachodzili miljardy jeŭra, ale jany pradstaŭlali fiktyŭnuju spravazdačnaść.
Hetyja hrošy išli na podkup jeŭrapiejskich palitykaŭ, jakija łabiravali intaresy Azierbajdžana ŭ ES i błakavali rezalucyi, što asudžajuć parušeńni pravoŭ čałavieka ŭ krainie. Taksama z rachunkaŭ fiktyŭnych kampanij apłačvalisia asabistyja vydatki vysokapastaŭlenych čynoŭnikaŭ Azierbajdžana. Akramia taho, na rachunki hetych kampanij pastupali dziasiatki miljonaŭ jeŭra ad rasijskaha pastaŭščyka zbroi — Rosabaroneksparta. Paśla hetyja hrošy pieraličvalisia na rachunak pieršaha vice-premjera respubliki.
Bolšaja častka srodkaŭ, jakija pastupili na rachunki brytanskich kampanij, vyvodziłasia z bankaŭ Azierbajdžana.
Siarod tych, kamu pieravodzili srodki ŭłady Azierbajdžana, nazyvajucca imiony niamieckaha i italjanskaha palitykaŭ Eduarda Lintniera i Łuki Vałonte, a taksama bałharskaha palityka Kalina Mitrava. Adznačajecca, što Lintnier byŭ siarod naziralnikaŭ na vybarach prezidenta Azierbajdžana ŭ 2013 hodzie i zajaviŭ, što vybary adpaviadali «niamieckim standartam», a praz dva tydni paśla viartańnia ŭ Bierlin atrymaŭ pieravod u 61 tysiaču jeŭra. Śćviardžajecca taksama, što Vałonte atrymaŭ bolš za dva miljony jeŭra, Mitraŭ atrymaŭ pa mienšaj miery 425 tysiač jeŭra za pryvatnyja kansultacyi ad azierbajdžanskaj kampanii Avuar.
