Zdareńnie adbyłosia 5 vieraśnia ŭ škole №1 u Ivanciejeŭcy pad Maskvoj.
Pavodle papiarednich źviestak, vučań 9A kłasa ŭvarvaŭsia ŭ kabiniet infarmatyki z krykami «Ja pryjšoŭ siudy zdochnuć!» i zahadaŭ školnikam sieści na padłohu. Paśla hetaha streliŭ nastaŭnicy ŭ hałavu z traŭmatyčnaha pistaleta i ŭ stol. Pry sabie ŭ maładoha čałavieka byli taksama niekalki bujnych pietard i małatok.
Pierad atakaj jon abnaviŭ status na svajoj staroncy va «Ukantakcie», napisaŭšy: «delete my life 05.09.17» («vydalić majo žyćcio 05.09.17»), a ŭ pierapiscy sa znajomaj paabiacaŭ zładzić siurpryz.
Adrazu paśla taho jak junak adkryŭ ahoń, u kłasie pačałasia panika, niekatoryja dzieci pačali vyskokvać z voknaŭ. Dvoje atrymali ŭdary, adna dziaŭčynka złamała nahu, piša lenta.ru.
U toj ža čas pa infarmacyi TASS, uvajšoŭšy ŭ kabiniet, staršakłaśnik raskidaŭ dymavyja šaški, a paśla streliŭ ź pnieŭmatyki. Złamyśnika zatrymali.
U svaju čarhu ŭ prakuratury horada Ivanciejeŭka raspaviali RBK, što padletak udaryŭ nastaŭnicu infarmatyki nievialikaj siakieraj pa hałavie, a paśla raskidaŭ pa kłasie dymavyja šaški i pačaŭ stralać ź pnieŭmatyki.
Nastaŭnica z adkrytaj čerapna-mazhavoj traŭmaj i troje vučniaŭ špitalizavanyja. Z padletkam pracujuć śledčyja, jakija vyśviatlajuć matyvy ŭčynkaŭ. Paviedamlajecca, što jon z dobraj siamji.
